Մեծի Տանն Կիլիկիոյ Կաթողիկոսութեան Մայրավանքի տպարանէն լոյս տեսաւ «Խաչիկ Պապիկեան Հրատարակչական Հիմնադրամ»ի 20-րդ հատորը՝ խորագրեալ «Մեծն Բրիտանիոյ քաղաքականութիւնը Հայոց Ցեղասպանութեան գծով»։ Հատորի հեղինակն է Թաուասիֆ Ալ-Մուքպըլ։ Այս աշխատութիւնը հեղինակը իբրեւ մագիստրոսականի թէզ ներկայացուցած ու պաշտպանած է 2023 թուականին՝ Սէուտական Արաբիոյ մայրաքաղաք Ռիատի Իմամ Մոհամմատ Ըպըն Սուուտ իսլամական համալսարանի ընկերաբանութեան կաճառի պատմագիտութեան ու քաղաքակրթութեան բաժանմունքին մէջ:
Ուսումնասիրութեան ճամբով, Ալ-Մուքպըլ լուսարձակի տակ կ՚առնէ Հայոց Ցեղասպանութեան հիմնական դերակատար Օսմանեան կայսրութիւնը, վերջինիս վարած պատմական քաղաքականութիւնը հայերու նկատմամբ, եւրոպական պետութիւններու կեցուածքը եւ Հայոց Ցեղասպանութեան գծով Մեծն Բրիտանիոյ քաղաքական ու ռազմական կեցուածքին դրդապատճառները։
Հատորը կարելի է ձեռք ձգել Կաթողիկոսարանի գրախանութէն, ինչպէս նաեւ այցելելով www.ciliciabookstore.com։
Leave a Reply