Ստացուած գիրքեր. «Կարելի՞ է արեւմտահայերէնը փրկել այսօրուան ցաւալի վիճակէն» (հեղինակ` Պերճ Թէրզեան)

Ա. ՄԱՆՃԻԿԵԱՆ

Գահիրէի մէջ 2025-ին լոյս տեսաւ Պերճ Թէրզեանի «Կարելի՞ է արեւմտահայերէնը փրկել այսօրուան ցաւալի վիճակէն» գրքոյկը, բաղկացած` 44 էջերէ:

Հեղինակը լուսարձակի տակ կ՛առնէ այն, որ սփիւռքի տարածքին գտնուող հայկական կրթական հաստատութիւններու դժուարութիւնները նոյնանման բնոյթ ունին` մատնանշելով, որ ամէն ոք տեղեակ է արեւմտահայերէնի անբաղձալի վիճակին մասին, սակայն ոեւէ համազգային նախաձեռնութիւն չ՛որդեգրուիր, եւ կացութիւնը հետզհետէ աւելի կը վատթարանայ:

Թէրզեան կը շարունակէ նշելով, որ այսօր երբ կը խօսինք արեւմտահայերէնը փրկելու եւ բարելաւելու մասին, նկատի պէտք է ունենանք հայութեան արեւմտահայ թեւը, որուն աշակերտական տարիքի մէջ գտնուող զանգուածին չնչին մէկ տոկոսը կը յաճախէ հայկական ամէնօրեայ վարժարաններ:

Հեղինակը կը շեշտէ, որ մենք աշխատանք պէտք է տանինք հայկական ամէնօրեայ վարժարան յաճախող աշակերտներուն արեւմտահայերէնի ուսուցիչ ապահովելու համար:

Ըստ Թէրզեանի, հայերէնի դասաւանդութեան գործը պէտք է ծրագրուի` նկատի առնելով աշակերտութեան տարբեր շերտաւորումներուն միջեւ գոյութիւն ունեցող հիմնական տարբերութիւնները. ա) ամէնօրեայ հայկական վարժարան յաճախող աշակերտներ. բ) շաբաթօրեայ հայկական վարժարան յաճախող աշակերտներ եւ գ) օտար վարժարան յաճախող օտարախօս հայ աշակերտներ:

Այս գրքոյկով հեղինակը կը նշէ, որ շատ բան կ՛ակնկալուի արեւմտահայերէն դասաւանդելիք ուսուցիչէն, հետեւաբար անոր պատրաստութիւնը նման պաշտօնի մը, յատուկ խնամքի կը կարօտի:

Արեւմտահայերէնի մէջ մասնագիտացած ուսուցչական հիմնարկի մը բացակայութիւնը եւ դասագիրքերու խայտաբղէտ վիճակը կ՛արգելակեն բնականոն դասընթացքներ, դիտել կու տայ ան:

Հեղինակը կ՛եզրափակէ` յայտնելով, որ ինչպէս կը տեսնուի, արեւմտահայերէնի փրկութեան գործը շատ մեծ տարողութիւն ունի եւ անոր լուծումը մէկ կողմի աշխատանքով չի կրնար իրականանալ, եւ կարիքը կայ տրամադրելի բոլոր ուժերու մասնակցութեան:

Գրքոյկին վերջին քանի մը էջերը կ՛ընդգրկեն սփիւռքի նախարարութեան նախաձեռնութեամբ 2010-ին կայացած համաժողովին առիթով հեղինակին «հայեցի դաստիարակութեան վիճակը Եգիպտոսում այսօր» զեկուցումը:

Ստացուած Գիրքեր «Կարելի՞ Է Արեւմտահայերէնը Փրկել Այսօրուան Ցաւալի Վիճակէն» (Հեղինակ` Պերճ Թէրզեան)