Թուրքիայում մեկ եռամսյակում արձանագրվել է քրդերենի կիրառումը խոչընդոտելու 24 դեպք

Թուրքիայում քրդերենի նկատմամբ վերաբերմունքի մշտադիտարկմամբ զբաղվող և այդ թեմայով հաշվետվություններ պատրաստող «Kurdish Monitoring» հարթակը հրապարակել է 2025-ի 1-ին եռամսյակի զեկույց։

Ըստ այդմ՝ հունվար-մարտ ամիսներին քրդերենի կիրառման 24 խախտում է արձանագրվել պետական, մեդիա, մշակույթի, կրթության ոլորտներում, ինչպես նաև կալանավայրերում։

Ամենաշատ խոչընդոտներն արձանագրվել են մեդիայի և մշակույթի ոլորտներում։ Թիրախավորվել են «Mezopotamya Ajansı» լրատվական գործակալությունը, «JINNEWS»-ը, ինչպես նաև «Ամերիկայի ձայն»-ի քրդերեն ծառայությունը: Դրանց կայքէջերն արգելափակվել են Թուրքիայում։

Իսկ մարտի 8-ին Գեբզեի տեխնիկական համալսարանում էլ արգելվել էր ուսանողուհիների երթը՝ քրդերեն կարգախոսներ հնչեցնելու պատճառաբանությամբ:

Բոլորովին վերջերս էլ խորհրդարանում ընդդիմադիր Ժողովուրդների հավասարություն և ժողովրդավարություն կուսակցության (DEM) պատգամավորի ելույթն էր ընդհատվել՝ քրդերեն «Jin, Jiyan, Azadî» կարգախոսը հնչեցնելու համար, իսկ այդ արտահայտությունը նիստի արձանագրություններում նույնիսկ չէր գրանցվել։

Մշտադիտարկում իրականացնող հարթակը զգուշացնում է, որ Թուրքիայում քրդերենի նկատմամբ սահմանափակումները ոչ թե պատահական, այլ համակարգային բնույթ են կրում։

Նշենք, որ «Kurdish Monitoring» հարթակը ստեղծվել է 2025-ի սկբին:

https://www.ermenihaber.am/am/news/2025/04/09/%D4%B9%D5%B8%D6%82%D6%80%D6%84%D5%AB%D5%A1-%D5%94%D6%80%D5%A4%D5%A5%D6%80%D5%A5%D5%B6/302069