Թուրքիայի նախագահի ավագ խորհրդական Չաղրի Էրհանը հայտնել է, որ Անկարան աջակցում է Ադրբեջանի քաղաքականությանը։ Ինչպես տեղեկացրել են ադրբեջանական լրատվամիջոցները, այս միտքը նա հնչեցրել է Ադրբեջանի կողմից օկուպացված Ստեփանակերտում (Լեռնային Ղարաբաղի մայրաքաղաք) տեղի ունեցող համաժողովում։
«Թուրքիան աջակցում է տարածաշրջանում խաղաղության եւ կայունության ամրապնդմանը: Ներկայում տարածաշրջանային համագործակցության կարեւոր հարթակներից մեկը ձեզանից յուրաքանչյուրին քաջածանոթ «3+3» հարթակն է»,- ընդգծել է Չաղրի Էրհանը:
Նա նաեւ նշել է, որ տարածաշրջանային համագործակցությունում կարեւոր դեր է ունենալու ոչ միայն ավտոմոբիլային եւ այլ տրանսպորտային, այլ նաեւ էներգետիկ միջանցքների զարգացման խթանումը։
Թուրք քաղաքական գործիչն ընդգծել է, որ Ադրբեջանը մատակարարում է նավթ եւ նավթամթերք համաշխարհային շուկաներ։ «Ադրբեջանը հարավկովկասյան տարածաշրջանում իր շահերի շրջանակում քաղաքականություն վարող երկիր է, եւ Թուրքիան աջակցում է Ադրբեջանի քաղաքական քայլերին այդ ուղղությամբ»,- ավելացրել է Չաղրի Էրհանը։
Leave a Reply