Սեբաստիայի (թուրք․ պաշտոնական անվանումը՝ Սիվաս-Ակունքի խմբ․) Ղանղալ (թուրք․ պաշտոնական անվանումը՝ Քանգալ-Ակունքի խմբ․) գավառում գտնվող Մանջըլըք գյուղի եկեղեցին վերածվել է ավերակի։ Այդ մասին, ըստ www.akunq.net –ի, հաղորդում է թուրքական «Իհլաս» լրատվական գործակալությունը։
Աղբյուրի փոխանցմամբ՝ այս եկեղեցին, որի կառուցման թվականն անհայտ է, վերականգման կարոտ է դարձել։ Եկեղեցու պատերին զանազան կրոնական խորհրդանիշներ են պահպանվել։ Թեև կառույցի որոշ հատվածներից քարեր են պոկվել, սակայն այն դեռ կարողանում է կանգուն մնալ։ Գյուղի բնակիչները պնդում են, թե եկեղեցին մի ժամանակ որպես կենտրոնական բանկ է ծառայել, իսկ այժմ անընդհատ ենթարկվում է գանձագողերի ավերածություններին։
Մանջըլըքի գյուղապետ Օզքան Բալթաջըն թուրքական լրատվամիջոցի թղթակցի հետ զրույցում հայտնել է, որ իրենք պաշտոնյաներից ակնկալում են, որ եկեղեցին վերանորոգվի և վերաբացվելով նպաստի այդ բնակավայրում զբոսաշրջության զարգացմանը։ Նա նաև նշել է, որ եկեղեցու՝ 30 տարի առաջվա վիճակը շատ է տարբերվում այժմյան դրությունից, և եթե այն ժամ առաջ վերականգնվի, մեծ օգուտներ կբերի գյուղին։
Մանջըլըք գյուղում ծնված-մեծացած Յըլմազ Բալթան իր հերթին ասել է, որ եկեղեցին նախկինում շատ գեղեցիկ է եղել, և իրենք մանուկ ժամանակ խաղացել են կառույցի ներսում։ Գանձագողերը մեծ վնաս են հասցրել շինությանը։ Շատերը գալիս են և եկեղեցու քարերը պոկում-տանում։ Նա նաև հավելել է, որ իշխանությունները պետք է շտապեն եկեղեցին վերականգնհելու գործում, քանի որ այդ դեպքում այն մեծապես կնպաստի ոչ միայն գյուղում, այլև ամբողջ Սեբաստիայում զբոսաշրջության զարգացման գործին։
Թարգմանեց Մելինե Անումյանը
Leave a Reply