Վրաստանը, Թուրքիան և Ադրբեջանը խորհրդարանների խոսնակների մակարդակով եռակողմ համագործակցության ձևաչափ կստեղծեն։ Նման պայմանավորվածություն է ձեռք բերվել Վրաստանի խորհրդարանի նախագահ Շալվա Պապուաշվիլիի և նրա թուրք գործընկեր Նուման Քուրթուլմուշի հանդիպման ժամանակ, հայտնում է Վրաստանի Առաջին ալիքը՝ վկայակոչելով խորհրդարանի մամուլի ծառայությանը։
Ըստ հաղորդման, Թուրքիայի Ազգային մեծ ժողովի նախագահը շնորհավորել է Շալվա Պապուաշվիլիին խորհրդարանի նախագահի պաշտոնում վերընտրվելու կապակցությամբ և նշել, որ «ժողովրդի կամքն ամեն ինչից վեր է․ բոլորը պետք է հարգեն ընտրությունների արդյունքները, որոնք պետք է հիմք դառնան հետագա զարգացման համար»։
Կողմերը նշել են, որ Վրաստանին և Թուրքիային կապում է ժողովուրդների միջև երկար տարիների արդյունավետ համագործակցությունն ու բարեկամությունը։
Հանդիպմանը քննարկվել են խորհրդարանական հարաբերությունների հետագա զարգացումը։ Կողմերը պայմանավորվել են, որ մոտ ապագայում Վրաստանի, Թուրքիայի և Ադրբեջանի միջև եռակողմ համագործակցության ձևաչափ կստեղծվի երկրների խորհրդարանների նախագահների մակարդակով։
Նուման Քուրթուլմուշը Շալվա Պապուաշվիլիին հրավիրել է Թուրքիա։
Հանդիպումը կայացել է Ուզբեկստանի մայրաքաղաք Տաշքենդում Միջխորհրդարանական միության 150-րդ վեհաժողովի շրջանակներում։
Leave a Reply