Հարաւային Կովկասի մէջ մնայուն խաղաղութիւնը այսօր աւելի մօտ է, քան երբեւէ, ըստ թրքական «Անատոլու» գործակալութեան, յայտարարեց Թուրքիոյ արտաքին գործոց նախարար Հաքան Ֆիտան:
«Անկասկած, այս կէտին հասնելու հիմքը այն է, որ եղբայրական Ատրպէյճան դադրեցուցած է իր հողերու բռնագրաւումը Ղարաբաղի մէջ: Մենք օրինակելի մակարդակով կը շարունակենք մեր երկկողմանի յարաբերութիւնները Ատրպէյճանի հետ: Կը ձգտինք համատեղ լուծումներ գտնել միջազգային բազմաթիւ խնդիրներու: Պատերազմէն ետք Հայաստան որոշեց օգտագործել իր նախապատուութիւնը խաղաղութեան եւ կայունութեան համար: Ուրախալի է, որ ատիկա կը շարունակուի: Թէ՛ Ատրպէյճանին, թէ՛ Հայաստանին կոչ կ՛ուղղենք` չկորսնցնել այս պատմական կարելիութիւնը», ըսաւ Ֆիտան:
Ան յիշեցուց, որ կողմերը բաւական ժամանակէ ի վեր առաջին անգամ առանձնազրոյց ունեցան Պոլսոյ մէջ` առանց երրորդ երկրի մասնակցութեան, եւ ընդգծեց, որ յարաբերութիւններու կարգաւորման գործընթացը, զոր իրենք կ՛իրականացնեն Հայաստանի հետ, Հարաւային Կովկասի համածիրին մէջ եւս կարեւոր է:
«Նշելով, որ Թուրքիոյ կառուցողական կամքն է, որ աստիճանաբար կարգաւորած է երկկողմանի յարաբերութիւնները` համաձայնեցնելով Ատրպէյճանի հետ, Ֆիտան բացատրած է, որ Հոկտեմբերին Պոլսոյ մէջ տեղի ունեցած 3+3 տարածաշրջանային համագործակցութեան հարթակի հանդիպման ընթացքին, կառուցողական ըմբռնումով քննարկած են տարածաշրջանին վերաբերող բոլոր հարցերը», կը գրէ «Անատոլու»ն:
Leave a Reply