Բահչելին՝ PKK-ի առաջնորդին ելույթի հնարավորություն տալու մասին. «Տեր եմ իմ խոսքին»

Թուրքիայի իշխող «Արդարություն և զարգացում կուսակցության» (ԱԶԿ-AKP) հետ «Ժողովուրդ» (Cumhur) դաշինքում գտնվող «Ազգայնական շարժում կուսակցության» (ԱՇԿ-MHP) առաջնորդ Դևլեթ Բահչելին անդրադարձել է վերջերս լայն քննարկումների առարկա դարձած իր հայտարարություններից մեկին:

Բահչելին մասնավորապես խոսել է Թուրքիայի կողմից ահաբեկչական ճանաչված «Քուրդիստանի բանվորական կուսակցության» (PKK-ՔԲԿ) հիմնադիր-առաջնորդ Աբդուլլահ Օջալանին ներում շնորհելու, ամբիոն հրավիրելու և այդպիսով Թուրքիայի դեմ ահաբեկչական գործողություններին վերջ տալու մասին հայտարարությանը՝ ընդգծելով, որ այն ուժի մեջ է:

«Ես իմ խոսքի տերն եմ»,-ասել է նա:

Նշված հայտարարությունը թուրք իշխանամետ գործիչն արել է «ԱՇԿ»-ի խորհրդարանական ֆրակցիայի հետ ունեցած հանդիպման ժամանակ:

Հիշեցնենք, որ ներման մասին հայտարարությանը հետևել էին մի շարք արձագանքներ ընդդիմադիրների կողմից: Հատկանշական էր «Ժողովրդահանրապետական կուսակցության» (ԺՀԿ-CHP) առաջնորդ Օզգյուլ Օզելի՝ «Եկեք քրդերին Թուրքիայի Հանրապետության տեր դարձնենք» մասին հայտարարությունը:

Չնայած այն բանին, որ թուրքական թե՛ սոցիալական, և թե՛ լրատվական մեդիայում խոսվում  էր քրդերի դեմ վարվող որոշակի քաղաքականության փոփոխման և մեղմացման միտումների մասին, հոկտեմբերի 23-ին Անկարայում տեղի ունեցած ահաբեկչությունը կրկին սրեց իրավիճակը, որի կազմակերպման մեջ թուրքական իշխանությունները մեղադրեցին «ՔԲԿ»-ին:

https://www.ermenihaber.am/am/news/2024/11/05/%D4%B9%D5%B8%D6%82%D6%80%D6%84%D5%AB%D5%A1-%D4%B2%D5%A1%D5%B0%D5%B9%D5%A5%D5%AC%D5%AB-PKK/289459