Այնթափում իսլամացած հայերի մասին ֆիլմ է ցուցադրվել

Այնթափում կազմակերպված կարճամետրաժ ֆիլմերի օրերի շրջանակում ցուցադրվել է նաև Նագեհան Ուսքանի «Հայրենի տուն Ադանա» (‘Sweet Home Adana’) վավերագրական ֆիլմը, որի հիմնական թեման իսլամացած հայությունն է։

Այդ մասին հայտնում է Akunq.net-ը՝ հիմնվելով Artıgerçek լրատվամիջոցում տեղ գտած հրապարակման վրա։

Աղբյուրի փոխանցմամբ՝ «Նար» արվեստի միության և «Դերսիմի նոր օր»-ի համագործակցությամբ արդեն երրորդ անգամ կազմակերպված վերոնշյալ միջոցառման ժամանակ առաջին անգամ ցուցադրվել է նաև Նագեհան Ուսքանի «Հայրենի տուն Ադանա» ֆիլմը, որի առանցքում բռնի իսլամացված մի հայ կնոջ պատմությունն է։

Միջոցառման փակման արարողության շրջանակներում էլ ցուցադրվել է «Ձայների հետքով» ֆիլմը, որի թեման հայ և քուրդ 2 կնոջ ասացողական պատմություններն են։

«Հայրենի տուն Ադանա» ֆիլմի ցուցադրումից հետո բեմադրիչ Նագեհան Ուսքանը պատասխանել է հանդիսատեսների հարցերին և տեղեկություններ հաղորդել «Հայրենի տուն Ադանա» ֆիլմի նկարահանման գործընթացի մասին։ Նա, մասնավորապես, նշել է․

«27 տարեկան էի, երբ իմացա, որ մորական տատս հայ է։ Իրականում, երբ առաջին անգամ Ադանա գնացի, նման վավերագրական ֆիլմ նկարահանելու միտք չունեի։ Առանձնապես հետաքրքրված չէի իմ անձնական պատմությունը ներկայացնելու հարցով։ Դա իրապես բարդ բան էր։ Հայկական հարցն ինձ համար միշտ քաղաքական կողմով էր հանդես եկել։ Վավերագրական ֆիլմում էլ իմ արյան կապն առաջնային պլանում չէ։ Ըստ էության, այդ պատմությունն առանձնապես գեղեցիկ էլ չէ։ Նմանատիպ շատ պատմություններ կան։ Ասում են, թե այդկերպ իսլամացված 4 միլիոն հայ է Թուրքիայում ապրում։ Սա ոչ միայն իմ, այլ՝ միլիոնավոր մարդկանց պատմությունն է»։

https://artigercek.com/kultur-sanat/habbe-kisa-film-gunleri-yonetmen-nagehan-uskan-bu-milyonlarca-insanin-315530h

Թարգմանեց Մելինե Անումյանը

Akunq.net