Ռուբեն Մելքոնյան. Իրական Թուրքիան ճանաչելը բառիս բուն իմաստով ազգային անվտանգության խնդիր է

Հայաստանցի թուրքագետների մեր խումբը գրել է «Թուրքիայի պատմություն. հարյուրամյա հանրապետության քաղաքական ուրվագծերը 1923-2023 թթ.»  նոր գիրքը։

Ինչպես ներկայացնում է գրքի համահեղինակ, թյուրքագետ Վարուժան Գեղամյանը, գրքում ոչ միայն մանրամասն ներկայացվում են Թուրքիա պետության ստեղծման ու զարգացման հիմնական փուլերը, այլև նրա վարած տարածաշրջանային քաղաքականության առանձնահատկությունները։

«Դժվար է գտնել որևէ այլ պետություն, Հայաստանից բացի, որը դատապարտված է սեփական անվտանգության և բարօրության համար հնարավորինս խորը և լիարժեք ճանաչել Թուրքիա պետությունը։



Առանց թուրքական պետության էությունը հասկանալու՝ հնարավոր չէ արդյունավետ կերպով դիմադրել դրանից բխող բոլոր տեսակի սպառնալիքներին։ Իրական Թուրքիան ու վերջինիս տարածաշրջանային քաղաքականությունը չհասկանալը հանգեցնում է մեծագույն աղետների։

Այսօր էլ մեզ փորձում են համոզել, որ Թուրքիայից եկող սպառնալիք չկա, իսկ եղածին էլ պետք է չդիմադրել։ Ուստի Թուրքիան ճանաչելը մեր հանրության ու ազգային էլիտաների համար առաջնահերթություն է»,-գրել է նա։

ԵՊՀ արևելագիտության ֆակուլտետի դեկան, թուրքագետ Ռուբեն Մելքոնյանն էլ ընդգծում է.

«Ինքնախաբեությունը` դրական թե բացասական շեշտադրումներով, հավասարապես քննադատելի երևույթ է. հարցը ավելի սուր է դառնում, երբ վերաբերվում է քո պետության և ազգի գոյութենաբանական իրական կամ տեսական սպառնալիքներին: Ուստի, իրական Թուրքիան ճանաչելը բառիս բուն իմաստով ազգային անվտանգության խնդիր է: Իսկ իրական Թուրքիան կարող են իմանալ և հասարակությանը ներկայացնել մասնագետները` թուրքագետները, ինչը և արել են սույն գրքի շրջանակներում: Գիրքն ընդգրկում է Թուրքիայի պատմությունը ստեղծումից ընդհուպ մինչև 2023 թվականը, և նման ընդգրկումով առաջինն է հայկական իրականության մեջ»։

Գրքի շնորհանդեսը, ըստ հեղինակների, կլինի շուտով։

https://www.panorama.am/am/news/2024/04/11/%D5%8C%D5%B8%D6%82%D5%A2%D5%A5%D5%B6-%D5%84%D5%A5%D5%AC%D6%84%D5%B8%D5%B6%D5%B5%D5%A1%D5%B6/2988357