Թուրքիան ակնկալում է, որ ԱՄՆ-ն կդադարեցնի աջակցությունը քուրդ զինյալներին

Թուրքիայի պետական «TRT Haber» հեռուստաընկերության կայքում տեղ գտած հրապարակման համաձայն՝ Թուրքիայի պաշտպանության նախարարության աղբյուրները խոսել են Թուրքիայի օրակարգային հարցերի շուրջ:

Մասնավորապես հարցուպատասխան է եղել Թուրքիայի կողմից ահաբեկչական ճանաչված խմբավորումների դեմ պայքարում ԱՄՆ-ի դիրքորոշման, ինչպես նաև Հունաստանի և Թուրքիայի միջև վստահության բարձրացմանը միտված քայլերի վերաբերյալ:

Ահաբեկչության դեմ պայքարի համատեքստում նշվել է, որ Թուրքիան ԱՄՆ-ից ակնկալում է Սիրիայում գործող Քուրդիստանի բանվորական կուսակցության (PKK) և Սիրիայի քրդական ուժերին (YPG) տրամադրվող աջակցության դադարեցում:

«Մենք ակնկալում ենք, որ ԱՄՆ-ը վերջ կտա այս ահաբեկչական կազմակերպություններին տրամադրվող բոլոր տեսակի օգնություններին և մեզ անկեղծորեն կաջակցի ահաբեկչության դեմ պայքարում»:

Իսկ Հունաստանի հետ ընթացող գործընթացների վերաբերյալ ասվել է հետևյալը. «Նոյեմբերի 13-ին Անկարայում իրականացված վստահության բարձրացման միջոցառումների ժողովը Հունաստանի հետ մեր հարաբերությունների զարգացման տեսանկյունից կարևոր քայլ էր: Երկու տարուց ավել դադարից հետո պատվիրակությունների միջև տեղի ունեցած հանդիպումները վերսկսեցին: Սկսվել է Աթենքում իրականացվելիք հերթական հանդիպման պլանավորման գործընթացը: Վերջին հանդիպման ընթացքում ևս դրական զարգացումներ են տեղի ունեցել»:

https://www.ermenihaber.am/am/news/2023/12/14/%D4%B9%D5%B8%D6%82%D6%80%D6%84%D5%AB%D5%A1-%D4%B1%D5%84%D5%86/264091