Այս կիրակի Դիարբեքիրում կնշվի Սուրբ Կիրակոս եկեղեցու անվանակոչման օրը

Այս կիրակի՝ հոկտեմբերի 22-ին, Դիարբեքիրի Սուրբ Կիրակոս եկեղեցում պատարագ կմատուցվի՝ Սուրբ Կիրակոսի անվանակոչության օրվա կապակցությամբ։ Այդ մասին, Akunq.net-ի փոխանցմամբ, հայտնում է «Ակօս» շաբաթաթերթի ինստագրամյան էջը։

Աղբյուրի համաձայն՝ պատարագի առթիվ Ստամբուլից Դիարբեքիր կուղևորվի հոգևորականների պատվիրակություն՝ արքեպիսկոպոս Արամ Աթեշյանի գլխավորությամբ։

Հիշեցնենք, որ Դիարբեքիրի Սուրբ Կիրակոս հայկական եկեղեցին, որը Մերձավոր Արևելքի ամենամեծ եկեղեցիներից մեկն է համարվում, վերաբացվել էր 2011 թ․։ Վերաբացումից հետո առաջին պատարագն այստեղ մատուցվել էր 2012 թ․ նոյեմբերի 4-ին։

2015 թ․ սկսված թուրք-քրդական բախումների հետևանքով մեծապես տուժել էր նաև Սուրբ Կիրակոսը։ Եկեղեցին մի քանի տարով դարձյալ փակվել էր թուրք-քրդական հակամարտության պատճառով։ Պետության միջոցներով վերանորոգվելուց հետո այն երկրորդ անգամ վերաբացվեց 2022 թ․ մայիսին։

Մելինե Անումյան

Akunq.net