Հոկտեմբերի 17-ին պոլսահայ աշխարհահռչակ լուսանկարիչ-լրագրող Արա Գյուլերի (Արամ Տերտերյան) մահվան 5-րդ տարելիցն էր: Գյուլերի շիրիմին հարգանքի տուրք է մատուցվել, որին մասնակցել են լուսանկարչի հարազատները, գործընկերները, ընկերներն ու շատ այլ մարդիկ:
Արա Գյուլերն իր կյանքի 90 տարիներից 68-ը նվիրել է լուսանկարչությանը։ Լուսանկարել է Ուինսթոն Չերչիլին, Ինդիրա Գանդիին, Մարիա Կալասին, Վիլյամ Սարոյանին, Ալֆրեդ Հիչքոքին, Սոֆի Լորենին, Մարկ Շագալին, Սալվադոր Դալիին, Պաբլո Պիկասոյին:
Գյուլերի հետ երկար տարիներ աշխատած Ֆաթիհ Ասլանը, ով եղել է նաև նրա օգնականը, հայտնել է լուսանկարչի հանդեպ ունեցած իր մեծ հարգանքն ու պատմել նրա մարդկային գծերի մասին։
Նշենք, որ Արա Գյուլեր լուսանկարիչ-լրագրողը ծնվել է 1928թ. օգոստոսի 16-ին Ստամբուլում: Նա հայտնի է «Ստամբուլի աչք» կամ «Ստամբուլի լուսանկարիչ», «100-ամյակի լավագույն լուսանկարիչ», «անգերազանցելի ֆոտոպատմաբան» պատվանուններով։
Ի դեպ՝ 2013-ին Հայաստանի ազգային պատկերասրահում կազմակերպվել էր Արա Գյուլերի «Բարև ձեզ» խորագիրը կրող ցուցահանդեսը, որի կապակցությամբ լուսանկարիչը ժամանել էր մայրաքաղաք Երևան:
Ermenihaber.am
Leave a Reply