Պետք է մշակել ռազմավարության և մարտավարության ամբողջական հայեցակարգ․ քննարկում Արևմտահայոց հարցերի ուսումնասիրության կենտրոնում (տեսանյութ)

Հոկտեմբերի 3-ին Արևմտահայոց հարցերի ուսումնասիրության կենտրոն գիտահետազոտական հիմադրամի կազմակերպմամբ տեղի ունեցավ «Անավարտ պատերազմ․ նոր մարտահրավերներ» խորագրով կլոր սեղան-քննարկումը։ Akunq.net-ի փոխանցմամբ՝ քննարկմանը զեկուցումներով հանդես եկան իրանագետ, պ․գ․թ․ Սարգիս Մկրտչյանը, պ․գ․դ․, պրոֆեսոր, ՀՀ ԳԱԱ Պատմության ինստիտուտի Հայկական հարցի և Հայոց ցեղասպանության պատմության բաժնի վարիչ Արմեն Մարուքյանը և դիվանագետ, ՀՀ նախկին արտակարգ դեսպանորդ Հրայր Կարապետյանը։

Իրանագետ Սարգիս Մկրտչանը ներկայացրեց հարավկովկասյան տարածաշրջանում Իրանի Իսլամական Հանրապետության քաղաքական շահերն ու կարմիր գծերը, ինչպես նաև Իրանում պանթյուրքիստական հոսանքների ներկա վիճակը և հայ-իրանական հարաբերությունները, ի մասնավորի՝ Իրանի որդեգրած քաղաքական դիրքորոշումը 44-օրյա պատերազմի ընթացքում։

Պատմաբան Արմեն Մարուքյանը կարևորեց Արցախի հայաթափման և Արցախի Հանրապետությունից Հայաստանի Հանրապետություն տեղափոխված փախստականների հետ կարատվելիք իրավական, փաստահավաքման և քաղաքական բնույթի աշխատանքները՝ մատնանշելով պետության անելիքներն ու կառավարության թերացումներն այս ոլորտում, ինչպես նաև բացթողումները՝ միջազգային հանրության հետ տարվող աշխատանքներում։

Դիվանագետ, ՌԴ-ում ՀՀ-ի նախկին դեսպանորդ Հրայր Կարապետյանն անդրադարձավ հայ-ռուսական հարաբերություններին՝ ներկայացնելով և վերլուծելով գործող իշխանությունների դիվանագիտական և քաղաքական սխալները և կանխատեսումներ անելով ներկայիս իշխանությունների որդեգրած քաղաքական ուղեգծի պատճառով սպասվող քաղաքական ու տնտեսական հետևանքների վերաբերյալ։

Զեկուցումներին հաջորդեցին հրավիրյալների ելույթները և դրանց շուրջ ծավալված քննարկումը։ Հնչեցվեցին հետևյալ մտքերը․ անհրաժեշտ է համացանցի միջոցով աշխատանքներ իրականացնել՝ ժողովրդի տրամադրությունը փոխելու ուղղությամբ։ Պետք է մշակել և գործողության մեջ դնել ռազմավարության և մարտավարության ամբողջական հայեցակարգ, որի մշակմամբ կզբաղվեն այդ նպատակով ձևավորված մասնագիտական խմբերը։ Երբ անդրադարձ եղավ միջազգային հանրության՝ Արցախյան իրադարձությունների հանդեպ ցուցաբերած վարքագծի հարցին, կարծիք հնչեց, որ մեծ տերությունները խուսափում են առերեսվել բուն խնդրին և իրերը կոչել իրենց անունով, քանի որ տեղի ունեցած դեպքերի մեջ առկա է նրանց մեղքի չափաբաժինը։

Տիգրան Չանդոյան

Akunq.net