Էրդողանը մեկնում է Նախիջևան՝ քննարկելու «Զանգեզուրի միջանցքի» հարցը

Թուրքական «Դյունա» լրատվամիջոցը որոշ մանրամասներ է ներկայացրել Թուրքիայի նախագահ Ռեջեփ Թայիփ Էրդողանի` Նախիջևանի Ինքնավար Հանրապետություն կայանալիք այցի օրակարգի վերաբերյալ: Մասնավորապես նշվում է, որ այցի ընթացքում Ադրբեջանի ու Թուրքիայի նախագահները քննարկելու են թուրք-ադրբեջանական հարաբերությունները, այդ թվում և ռազմական, տնտեսական ոլորտներում: Օրակարգում է լինելու նաև «Ադրբեջանի հակաահաբեկչական գործողությունը» և «անջատողական» հայկական ուժերի զինաթափման գործընթացը»:

Ըստ աղբյուրի` ակնկալվում է, որ երկու ղեկավարները միջազգային հանրությանը նոր ուղերձներ կհղեն «Զանգեզուրի միջանցքի» բացման համար, որը կապահովի Ադրբեջանի և Նախիջևանի Ինքնավար Հանրապետության միջև կապը։

Աղբյուրը պնդում է, որ  44-օրյա պատերազմից հետո ստորագրված եռակողմ հայտարարությանն ավելացվել է կետ «Զանգեզուրի միջանցքի» բացման վերաբերյալ, այնուամենայնիվ, անցել է 3 տարի և այն դեռևս չի բացվել:

Դիտարկում է արվում, որ եթե «Զանգեզուրի միջանցքը» իրականություն դառնա, ապա Թուրքիայից կիրականացվեն ուղիղ ցամաքային փոխադրումներ դեպի Կենտրոնական Ասիայի երկրներ, ինչպես նաև Ադրբեջան, ինչը կհանգեցնի թյուրքական աշխարհում առևտրային, լոգիստիկ և քաղաքական կապերի  էլ ավելի ամրապնդմանը։

Մեկօրյա այցի ընթացքում Էրդողանն Ալիևի հետ կմասնակցի Իգդիր-Նախիջևան գազատարի հիմնարկեքի արարողությանը: Թուրքիայի ղեկավարը կմասնակցի նաև Նախիջևանում արդիականացված ռազմական համալիրի բացման արարողությանը։ 

https://www.ermenihaber.am/am/news/2023/09/25/%D4%B7%D6%80%D5%A4%D5%B8%D5%B2%D5%A1%D5%B6-%C2%AB%D4%B6%D5%A1%D5%B6%D5%A3%D5%A5%D5%A6%D5%B8%D6%82%D6%80%D5%AB-%D5%B4%D5%AB%D5%BB%D5%A1%D5%B6%D6%81%D6%84%D5%AB%C2%BB/257402