Թուրքական քարոզչամեքենան ամերիկացիներին նորից մեղադրում է քրդերի հետ համագործակցելու մեջ

Թուրքական քարոզչամեքենան կրկին թիրախավորել է ԱՄՆ զինված ուժերին և մի շարք անհիմն մեղադրանքներ հնչեցրել նրանց հասցեին։ 

Ըստ Թուրքիայի հետախուզական ծառայության զեկույցի՝ Իրաքյան Քուրդիստանում ԱՄՆ հյուպատոսության գլխավոր ռազմական խորhրդական Քոլորան Սանբորնը հանդիպել է Թուրքիայի կողմից ահաբեկչական համարվող Քուրդիստանի բանվորական կուսակցության (ՔԲԿ-PKK) ղեկավարներից մեկի հետ:

Մասնավորապես նշվում է, որ հանդիպումը տեղի է ունեցել Սանբորնի և ՔԲԿ-ի արտաքին հարաբերությունների պատասխանատուի միջև:

Նշվում է, որ իբր հանդիպման ընթացքում ՔԲԿ-ի ներկայացուցիչը ԱՄՆ-ից օգնություն է խնդրել Իրաքի հյուսիսում Թուրքիայի կողմից իրականացվող ռազմական օպերացիաներին դիմակայելու նպատակով:

Միջանկյալ նշենք, որ թուրքական մամուլը փաստացի ԱՄՆ-ին մեղադրել է PKK-ի հետ համագործակցելու մեջ, չնայած, որ ԱՄՆ PKK-ին ներառել է ահաբեկչական կառույցների ցանկում։ 

Հաճախ թուրքական մամուլը և առհասարակ Թուրքիայի իշխանությունները մեղադրում են ԱՄՆ-ին՝ PKK-ի ու Սիրիայի  քրդական ուժերի միջև տարբերություն դնելու մեջ։ Ըստ ԱՄՆ-ի` Սիրիայի քրդական ուժերը  (SDG, YPG) կարևոր գործոն են «Իսլամական պետություն»  և տարածաշրջանում գործող այլ ահաբեկչական կառույցների դեմ պայքարում։  Ըստ թուրքական քարոզչամեքենայի՝ այդ կառույցները՝  (SDG, PKK, YPG)  նույնն են, և եկուսն էլ սպառնում են Թուրքիայի սահմանների անվտանգությանը։  

Բացի այդ, թուրքական «Yeni Şafak» թերթի կայքի համաձայն՝ քուրդ առաջնորդները Թուրքիայի կողմից իրականացվող գործողությունների համատեքստում ԱՄՆ-ի ցուցաբերած անգործության առթիվ հայտնել են իրենց դժգոհությունը:

Սույն տեղեկությունը չի հաստատվել ԱՄՆ զինված ուժերի կողմից։

Հավելենք, որ մշտապես թուրքական իշխանությունների զայրույթն է առաջացնում այն փաստը, որ ԱՄՆ-ն պարբերաբար Սիրիայի քրդական ուժերին ռազմական օգնություն է ցուցաբերում։

https://www.ermenihaber.am/am/news/2023/08/31/%D4%B9%D5%B8%D6%82%D6%80%D6%84%D5%AB%D5%A1-%D4%B1%D5%84%D5%86-%D5%94%D4%B1%D4%BF-%D5%94%D4%B2%D4%BF/255538