Թուրքիան 2023թ. կարողացել է հասնել պաշտպանական արդյունաբերության արտադրանքի արտահանման գծով պայմանագրերի կնքման ռեկորդային ծավալների։ Այս մասին երեքշաբթի հայտարարել է հանրապետության նախագահ Ռեջեփ Թայիփ Էրդողանը Ստամբուլում բացված IDEF-23 ցուցահանդեսի մասնակիցներին հղած տեսաուղերձում։
«Անցած շաբաթ Պարսից ծոցի երկրներ կատարած մեր այցելության ժամանակ մենք ստորագրել ենք մեր պատմության մեջ ամենամեծ թվով արտահանական պայմանագրերը պաշտպանական արդյունաբերության արտադրանքի գծով։ Մենք վստահ ենք, որ IDEF-23 ցուցահանդեսում այդ համաձայնագրերին կավելանան նորերը։ Ինչպես միշտ ասել ենք, մեր նպատակը միայն արտադրանքի վաճառքը չէ։ Մենք նպատակ ունենք երկարաժամկետ գործընկերային հարաբերություններ հաստատել եւ զարգացնել համատեղ նախագծեր։ Մենք ուրախ ենք առաջարկել մեր գիտելիքները, նոու-հաուն եւ փորձը պաշտպանական արդյունաբերության ոլորտում՝ ի բարօրություն մեր բարեկամների»,- ընդգծել է նա։
Էրդողանի Սաուդյան Արաբիա կատարած ուղեւորության արդյունքներով եւս կողմերը ստորագրել են մի քանի համաձայնագրեր եւ փոխըմբռնման հուշագրեր, որոնք ենթադրում են համատեղ նախագծերի իրականացում էներգետիկ, ներդրումային եւ պաշտպանական արդյունաբերության ոլորտներում։ Մասնավորապես, թագավորությունը երկու պայմանագիր է կնքել թուրքական Baykar ընկերության հետ, որն արտադրում է Bayraktar անօդաչու թռչող սարքերը։
Leave a Reply