“ՀԱՄԱՀԱՅԿԱԿԱՆ ԽԱՂԵՐԸ ԻՐԱԿԱՆԱՑՈՒՑԻՆ ԻՄ ԵՐԱԶԱՆՔԸ”
Երգչուհի Սիպիլ հրաւիրուած է ելոյթ ունենալու Համահայկական 8րդ խաղերու բացման հանդիսութեան ընթացքին: Մեր ընթերցողները կը յիշեն որ 2011ի խաղերը ճակատագրական նշանակութիւն ունեցան իրեն համար, փոխեցին կեանքի գիծը եւ երգարուեստը դարձուցին գլխաւոր ասպարէզ եւ առիթ ստեղծեցին որ թեւ առնեն իր երազանքները:
Սիպիլ 5 Օգոստոսի բացման հանդիսութեան ընթացքին ալ բեմ պիտի ելլէ: Խաղերուն ընդառաջ, համահայկականի կայքէջին վրայ հրապարակուեցաւ իրեն հետ կատարուած հարցազրոյց մը, զոր արեւմտահայերէնի վերածելով կը ներկայացնենք մեր ընթերցողներուն.
Համահայկական խաղերը դուռներ կը բանան, ես ատիկա վստահ կրնամ ըսել իմ օրինակով, կ՚ըսէ պոլսահայ երգչուհի Սիպիլ: Ան 2011էն ի վեր Համահայկական խաղերու հետ է եւ տեսակ մը խորհրդանիշ դարձած է: Երգչուհին այս տարի նոյնպէս պիտի մասնակցի բացման հանդիսութեան:
Սիպիլ իր կեանքի ամենամեծ ձեռքբերումը կը նկատէ այս միջոցառումը, որ աշխարհի չորս ծագերու հայերը կը միաւորէ հայրենի երկրին մէջ:
“Համահայկական խաղերը կեանքիս ամենամեծ ձեռքբերումն էին, զոր ունեցայ ասպարէզիս ընթացքին: Հայաստանի ու Սփիւռքի մէջ համահայկական խաղերուն շնորհիւ ճանչցան զիս: Իմ առաջին փորձառութիւնը ձեռք ձգեցի Համահայկական 5րդ խաղերու բացման հանդիսութեան ընթացքին: Հրաւէր ստացած էի Իշխան Զաքարեանէն: Այդ օրէն մինչեւ այսօր, բոլոր խաղերու ընթացքին յատուկ հիւրի հրաւէր կը ստանամ: Այս տարի նոյնպէս կը պատրաստուիմ մասնակցելու 8րդ խաղերու բացման”, կ՚ըսէ Սիպիլ, որու մօտ խաղերուն հետ առնչակից յիշողութիւնները յուզում կը յառաջացնեն:
Սիպիլ կ՚ապրի ու կը ստեղծագործէ Իսթանպուլի մէջ եւ որպէս Սփիւռքի ներկայացուցիչ, ան իւրովի կը պատկերացնէ Հայաստան-Սփիւռք կապը: Ինք ալ մասնակից է այդ կապը ամրապնդելու եւ զարգացնելու ծրագիրներուն: Սիպիլի խօսքերով, խաղերու ընթացքին մարզական մրցումները խորհրդանշական բնոյթ կը կրեն, կարեւորն ու առաջնահերթը հայութեան համախմբումն ու միասնականութիւնն է, հայրենիքի հետ հայ երիտասարդներու կապը:
Սիպիլ կը հաւատայ որ համահայկական խաղերու գաղափարը ներկայիս աւելի քան արդիական է, այս դժուարին օրերուն, հայութիւնը կարիքն ունի միասնական ըլլալու:
“Այո՛, մրցումներու ընթացքին յաղթանակը կարեւոր է, բայց ամենակարեւորը նոր կապերու, նոր ընկերներու ձեռքբերումն է, հայրենիքը ճանչնալն է”, կ՚ըսէ Սիպիլ:
Համահայկական խաղերը Սիպիլին համար առիթ ստեղծած են որ ան իրականութիւն դարձնէ իր երազանքը: “Ես մեծ երազանք մը ունէի: Կ՚ուզէի Անիի մայր տաճարին մէջ երգել “Տեսնեմ Անին ու նոր մեռնեմ” երգը: Այդ երազանքը ինծի համար անհասանելի ու անիրագործելի կը թուէր, պարզապէս անգամ մը համարձակեցայ եւ թրքական հեռատեսիլի կայաններէն մէկուն մէջ, հարցազրոյցի մը ընթացքին պատմեցի ցանկութեանս մասին”, կ՚ըսէ երգչուհին:
Սիպիլ ա՛յդ երգով մասնակցած էր 2011ի համահայկական խաղերու բացման հանդիսութեան: “Չափազանց յուզուած ու զգածուած էի: Անիի մայր տաճարին մէջ արցունքոտ աչքերով երգեցի: Ուրիշ էր մթնոլորտը, տարբեր էր: Բառեր չունիմ զգացումներս արտայայտելու համար: Ինքզինքս բախտաւոր նկատեցի այդ անմոռանալի պահին արժանի ըլլալու համար”, կը յիշէ Սիպիլ:
Ան չ՚ուզեր բացայայտել թէ ո՞ր երգով պիտի մասնակցի հանդիսութեան, միայն գեղեցիկ անակնկալ մը կը խոստանայ հանդիսականներուն:
Leave a Reply