Ամերիկայի Միացյալ Նահանգների Կոնգրեսի ստորին՝ Ներկայացուցիչների պալատի մի խումբ կոնգրեսականներ կրկին համապատասխան պալատին են ներկայացրել Հայոց ցեղասպանության կրթական ակտը՝ հիմք ընդունելով այն, որ ԱՄՆ Կոնգրեսն ու նախագահը պաշտոնապես ճանաչել են այս հանցագործությունը: Այս մասին փոխանցված հաղորդագրությամբ Tert.am-ին տեղեկացրել է Ամերիկայի Հայ դատի հանձնախումբը (ANCA):
Ակտը նորից ներկայացնելու նախաձեռնությամբ հանդես են եկել կոնգրեսականներ Աննա Էշուն, Դեյվիդ Վալադաոն, Թեդ Լյուն և Գաս Բիլիրակիսը: Միջոցը նախատեսում է ֆինանսավորել Կոնգրեսի գրադարանի կրթական ծրագրերը Հայոց ցեղասպանության պատմության, դրանից քաղած դասերի, հետևանքների և դրա համար ներկայում վճարվող գնի վերաբերյալ:
Օրինագծով նախատեսվում է 5 տարվա ընթացքում 10 միլիոն ԱՄՆ դոլարի ֆինանսավորում տրամադրել Կոնգրեսի գրադարանին՝ ԱՄՆ քաղաքացիներին ուսանելու 1915-1923 թթ. միլիոնավոր հայերի, հույների, ասորիների, քաղդեացիների, սիրիացիների, արամեացիների, մարոնիների և այլ քրիստոնյաների՝ Օսմանյան կայսրության կողմից համակարգված ու կանխամտածված, պետականորեն հովանավորվող զանգվածային սպանությունների, ազգային մշակույթի յուրացման կամ ոչնչացման և աքսորի մասին:
Նշվում է, որ Հայոց ցեղասպանության կրթական ակտը փորձում է հակազդել այն քարոզչությանը, որը պնդում է, թե «1915-1923 թթ. Օսմանյան Թուրքիայի կողմից միլիոնավոր քրիստոնյաների համակարգված զանգվածային սպանությունները տեղի չեն ունեցել»։
«Քանի որ Ադրբեջանը Թուրքիայի աջակցությամբ բացահայտորեն ձգտում է ավարտին հասցնել Հայոց ցեղասպանությունը, ամերիկյան դպրոցականներին ավելի քան երբևէ անհրաժեշտ է դասեր քաղել ողջ մարդկության դեմ դեռևս անպատիժ, դեռ շարունակվող հանցագործությունից», – հայտնել է Ամերիկայի Հայ դատի հանձնախմբի գործադիր տնօրեն Արամ Համբարյանը:
Leave a Reply