Թուրքիայի պաշտպանության նախարարը եղել է հայաբնակ գյուղում

Թուրքիայի պաշտպանության նախարար Հուլուսի Աքարը և զինված ուժերի Գլխավոր շտաբի պետ Յաշար Գյուլերը եղել են երկրաշարժից տուժած հայկական Վաքըֆլը գյուղում։

Թուրքիայի ՊՆ-ի տարածած հաղորդագրության համաձայն՝ Աքարը զննել է գյուղում գտնվող թանգարանը և տները, որոնք տուժել են երկրաշարժից։ Նրան իրավիճակի մասին տեղեկություններ է հայտնել գյուղապետ Պերճ Քարթունը։ Նախարարը զրույց է ունեցել տեղի բնակիչների հետ, որոնց մեջ է եղել նաև Վաքըֆլըի հայկական համայնքի ղեկավար Ջեմ Չափարը։

Չափարը գոհունակություն է հայտնել, որ երկրաշարժից հետո Հաթայի նահանգապետարանը և ողջ պետական կառույցները իրենց կողքին են եղել՝ շեշտելով, որ “թուրքերի և հայերի միջև հազարամյա բարեկամություն և միասնություն կա”։

Աքարն էլ ի պատասխան արձագանքել է․ «Մենք բոլորս՝ 85 միլիոնս, վշտի և ուրախության մեջ մեկ ենք, միասնական ենք, մեկ սիրտ և մեկ բռունցք ենք։ Բոլորս Թուրքիայի Հանրապետության պատվավոր, առաջին կարգի քաղաքացիներն ենք։ Այս դրոշը մեր դրոշն է, Անկարան մեր մայրաքաղաքն է»։

https://www.ermenihaber.am/am/news/2023/04/04/%D4%B9%D5%B8%D6%82%D6%80%D6%84%D5%AB%D5%A1/246383