Թուրքիայի հայկական գյուղի գյուղապետի դեմ հալածանքներ են սկսվել

Թուրքիայի պաշտոնապես «միակ հայկական գյուղը» համարվող Վաքըֆլըի գյուղապետ Պերճ Քարթունի դեմ հալածանքներ են սկսվել։ Մասնավորապես ոստիկանները ներխուժել են նրա տուն և առգրավել ալկոհոլային խմիչքներ, որոնք նա պահում էր տեղացի և արտասահմանցի զբոսաշրջիկներին նվիրվելու նպատակով։

Այդ մասին հաղորդում է Akunq.net-ը՝ հիմնվելով թուրքական լրատվամիջոցներում հրապարակված լուրերի վրա։

Աղբյուրի համաձայն՝ տարիներ շարունակ գյուղապետը լիկյոր, գինի և մուրաբա է պատրաստել տվել և տանը պահել՝ հատկապես օտարերկրյա հյուրերին նվիրելու համար։ Գյուղապետի տուն ներխուժել են՝ հիմնվելով գործող օրենքների վրա, ըստ որոնց՝ ալկոհոլային խմիչքների՝ տան պայմաններում արտադրությունն արգելված է։

Դեպքը հարուցել է գավառի բնակչության զարմանքը, որն արձագանք է ստացել նաև սոցիալական ցանցերում։ Այստեղի բնակիչները մասնավորապես շեշտում են, որ Վաքըֆլը գյուղը, որով միշտ հպարտացել են, նահանգի միակ հայկական գյուղն է, որ նաև զբոսաշրջիկների հոսք է ապահովել։

Այստեղի բնակիչները հայտնում են, որ թեև ոստիկանների կողմից ձեռնարկված այդ գործողությունն «օրինական» է եղել, սակայն իրենք ապշել են, քանի որ այստեղ տարիներ շարունակ տեղական լիկյորներ և գինիներ են արտադրվել, և մինչ այդ որևէ խնդիր չի եղել։

Նրանք նաև հավելում են, թե ինչպես որ Մարդինում, Թրակիայում և Կապադովկիայում են տեղական գինիներ պատրաստվում, այնպես էլ Սամանդաղի բնակիչներն իրավունք ունեն իրենց տեղական արտադրանքն իրացնել։

Բնակիչները ևս նկատում են, որ այս դեպքը խտրականության տարրեր է պարունակում։

Բնականաբար, հարկ չկա բացատրելու, թե ինչով է պայմանավորված եղել այս հարձակումը հայկական գյուղի գյուղապետի տան վրա, այն դեպքում, երբ տեղական ալկոհոլային խմիչքներ արտադրվում են նաև Թուրքիայի այլ նահանգներում ու գավառներում․ Վաքըֆլըն հայկական գյուղ է, գյուղապետն էլ՝ ՀԱՅ․․․    
https://www.korfezgazete.com/vakifli-muhtarina-sahte-alkol-baskini/

Թարգմանեց Մելինե Անումյանը

Akunq.net