Թուրքիայում շարունակվում են փոքրամասնությունների վաքըֆների (հիմնադրամների) վարչության անդամների ընտրությունները։ Դեկտեմբերի 25-ին նախատեսված Ստամբուլի Բեյօղլու (Բերա) շրջանի Երեք խորան հայկական եկեղեցու հիմնադրամի ընտրությունները հետաձգվել են, սակայն պոլսահայ համայնքն այնուամենայնիվ տոնական օրերին ևս մասնակցել է ընտրությունների։
Այդ մասին, Akunq.net-ի փոխանցմամբ, հայտնում է Ստամբուլում տպագրվող «Ակօս» հայկական երկլեզու շաբաթաթերթը։
Ըստ աղբյուրի՝ արդեն կատարվել են Ստամբուլի Կարագյոզյան որբանոցի, Գալֆայան որբանոցի, Գում Գափուի Սուրբ Մարիամ Աստվածածին մայր եկեղեցու և դպրոցի, Գալաթայի Սուրբ Գրիգոր Լուսավորիչ հայկական եկեղեցու և դպրոցի, Սկյուտարի Սուրբ Խաչ Դպրեւանք վարժարանի և այլ հիմնադրամների ընտրությունները։
Բացի այդ, տեղի են ունեցել նաև Կեսարիայի Սուրբ Գրիգոր Լուսավորիչ եկեղեցու հիմնադրամի և Տիգրանակերտի (Դիարբեքիրի) Սուրբ Կիրակոս հիմնադրամի ընտրությունները։
Գում Գափուի Սուրբ Մարիամ Աստվածածին եկեղեցու և դպրոցի հիմնադրամի նախկին նախագահ Հրանտ Մոսկովյանն ու ղեկավարներ Մինաս Արսլանը և Դավիթ Դամլան վերընտրվել են։
Կարագյոզյան որբանոցի հիմնադրամում ևս վերընտրվել են որոշ ղեկավարներ, նաև նոր անդամներ են ընդգրկվել։
Դեկտեմբերի 24-ին տեղի ունեցած Կեսարիայի Սուրբ Գրիգոր Լուսավորիչ հիմնադրամի ընտրությունների արդյունքների համաձայն՝ վերընտրվել է նախկին նախագահ Զատիկ Թոքերը։
Տիգրանակերտի Սուրբ Կիրակոս եկեղեցու հիմնադրամում վերընտրվել է նախկին նախագահ Էրգուն Այըքը, ինչպես նաև՝ ղեկավար խորհրդում ընդգրկվել են Բեդրի Այսելին, Փելին Այըքը, Հովհաննես Գաֆֆուր Օհանյանը, Քենան Սարրաֆը, Մեսուրե Քափլանը և Վոլքան Արաթը։
Թարգմանեց Մելինե Անումյանը
Akunq.net
Leave a Reply