Սուրբծննդյան պատարագ Ստամբուլի Սենտ Անտուան եկեղեցում

Ստամբուլի Բեյօղլու (Կոստանդնուպոլսի Բերա) շրջանի Իսթիքլալ պողոտայի վրա գտնվող ֆրանսիական կաթոլիկ Սենտ Անտուան եկեղեցում սուրբծննդյան պատարագ է մատուցվել։ Այդ մասին, Akunq.net-ի փոխանցմամբ, հաղորդում է թուրքական «Փոսթա» պարբերականի կայքէջը։

Աղբյուրի համաձայն՝ դեկտեմբերի 24-ի գիշերը կատարված արարողությանն իրենց աղոթքներով մասնակցել են բազմաթիվ քրիստոնյաներ։ Նրանց մեջ եղել են նաև օտարերկրյա քաղաքացիներ։

Պատարագին ներկա են գտնվել նաև Բեյօղլու շրջանի կառավարիչ Ալի Հայդար Յավուզը և այլ հրավիրյալներ։

Պատարագից առաջ մասնակիցները մոմեր են վառել և աղոթքներ հնչեցրել, իսկ սուրբծննդյան պատարագը մեկնարկել է ժամը 21։00-ին։ Պատարագի ընթացքում Ավետարանից հատվածներ են ընթերցվել։

Հիշեցնենք, որ 1724 թ․ կառուցված Սենտ Անտուանն ամենամեծ կաթոլիկ եկեղեցին է Ստամբուլում։

https://www.posta.com.tr/gundem/saint-antuan-kilisesinde-noel-ayini-2595758

Թարգմանեց Մելինե Անումյանը

Akunq.net