Թուրքիայի տարբեր քաղաքներում սուրբծննդյան պատարագներ են մատուցվել

Թուրքիայի Ստամբուլ (Կոնստանդնուպոլիս), Էդիրնե (Ադրիանապոլիս), Մերսին և Հաթայ (Ալեքսանդրեթ) նահանգներում մատուցվել են սուրբծննդյան պատարագներ։ Այդ մասին հայտնում է Akunq.net-ը՝ վկայակոչելով թուրքական լրատվամիջոցները։

Ստամբուլում պատարագը մատուցվել է Այա Յորգի եկեղեցում, Կ․Պոլսի հունաց տիեզերական պատրիարք Բարդուղիմեոսի ձեռամբ։ Արարողությանը մասնակցել են ոչ միայն հույներ, այլ նաև տարբեր երկրներից այցելած ուղղափառներ, ովքեր մոմեր են վառել և աղոթել։

Էդիրներում պատարագ է մատուցվել բուլղարական Սվետի Գեորգի եկեղեցում, որին մասնակցել են Բուլղարիայում և Էդիրնեում ապրող ուղղափառ քրիստոնյաները։

Պատարագի արարողություններ են կատարվել նաև Հաթայ նահանգի Էսքենդերուն և Անթաքիա գավառների կաթոլիկ եկեղեցիներում։

Սուրբծննդյան տոնի կապակցությամբ Թուրքիայում ապրող քրիստոնյա քաղաքացիներին շնորհավորել է հանրապետության նախագահ Ռեջեփ Թայիփ Էրդողանը, ով իր հղած ուղերձում մասնավորապես նշել է․

«Մեր պատկանած քաղաքակրթության արժեքների ուղղությամբ, տարբեր կրոնների և մշակույթների պատկանելիությունն ընկալում ենք որպես հարստություն։ Մեր ազգի խաղաղության և անվտանգության, միասնականության հիմքը եղող այդ ընկալումը մեր ամենաէական ուժն է, որ ապագայում նույնպես ապահովելու է մեր խաղաղ համագոյակցությունը։ Մաղթում եմ, որ մեր քրիստոնյա քաղաքացիների կողմից նշվող Սուրբծննդյան տոնը առիթ դառնա համերաշխության մթնոլորտի զարգացման համար։ Այդ զգացումով և մտածումներով մեկ անգամ ևս շնորհավորում եմ համայն քրիստոնյա աշխարհի և հատկապես մեր քրիստոնյա քաղաքացիների տոնը և իրենց ողջություն մաղթում»։

https://www.aydinlik.com.tr/haber/turkiyede-noel-kutlamalari-357890

Թարգմանեց Մելինե Անումյանը

Akunq.net