Թուրքիայի ներքին գործերի նախարար Սուլեյման Սոյլուն տեղեկացրել է Ստամբուլի Իսթիկլալ պողոտայում ահաբեկչության մեջ կասկածվողի ձերբակալման մասին, հաղորդել է «Անադոլուն»։
Նա հաստատել է, որ հարձակման հետեւանքով զոհվել է ութ մարդ, 81 հոգի վիրավորվել է։ Նրա խոսքով՝ 50 տուժած դուրս է գրվել հիվանդանոցներից, հինգը գտնվում է վերակենդանացման բաժանմունքներում։ Նա նաեւ ավելացրել է, որ երկու տուժած ծայրահեղ ծանր վիճակում է։ Նա նշել է, որ մինչեւ կասկածյալի ձերբակալությունը կալանավորվել էր 21 մարդ։
«Մեր գնահատականն այսպիսին է. մահասփյուռ ահաբեկչության գրոհի մասին հրամանը տրվել է Սիրիայի հյուսիսային Այն-էլ-Արաբից, որտեղ տեղակայված է Քրդական աշխատավորական կուսակցության (YPG) կենտրոնակայանը»,- ասել է Սոյլուն։
«Ակնհայտ է, որ մեր, այսպես կոչված, դաշնակիցները, որոնք բարեկամ են համարվում, անկեղծ չեն եւ կամ թաքցնում են ահաբեկիչներին իրենց երկրում, կամ սնում են ահաբեկիչներին իրենց օկուպացրած տարածքներում ու նրանց փող ուղարկում սեփական սենատներից»,- ասել է Սոյլուն՝ ավելացնելով, որ Թուրքիան առաջիկայում պատասխան միջոցներ կձեռնարկի ահաբեկչության հետ կապված։
Թուրքիայի արդարադատության նախարար Բեքիր Բոզդաղի խոսքով՝ տեսահսկման խցիկների նկարահանած կադրերում երեւում է, թե ինչպես է կինը ավելի քան 40 րոպե նստած մնացել նստարանին, այնուհետեւ կանգնել է պայթյունից մեկ կամ երկու րոպե առաջ՝ պայուսակը կամ պոլիէթիլենային տոպրակը թողնելով։ «Երկու վարկած կա։ Կամ այդ տոպրակում եղել է մեխանիզմ, որն ինքն իրեն է պայթել, կամ ինչ-որ մեկը պայթեցրել է այն հեռահար»։
Leave a Reply