Քուրդ հայտնի երգչուհու այցը Արևմտահայոց հարցերի ուսումնասիրության կենտրոն

Երեկ Արևմտահայոց հարցերի ուսումնասիրության կենտրոն գիտահետազոտական հիմնադրամ այցելեցին եվրոպաբնակ քուրդ հայտնի երգչուհի Սաքինա Թեյնան և գերմանացի ռեժիսոր Անդրեաս Ռոխոլը։ Նրանք Հայաստանում էին գտնվում Սաքինա Թեյնային նվիրված վավերագրական ֆիլմի նկարահանումներն իրականացնելու նպատակով։

Այդ մասին հայտնում է Արևմտահայոց հարցերի ուսումնասիրության կենտրոն գիտահետազոտական հիմնադրամի պաշտոնական կայքէջ www.akunq.net/am-ը։

Աղբյուրի փոխանցմամբ՝ սույն ֆիլմի հիմնական նկարահանումների իրականացվել են Գառնիում և Արագած լեռան վրա։ Այն կդառնա Անդրեաս Ռոխոլի երրորդ ֆիլմը և պատրաստ կլինի մյուս տարվա ամռանը։ Գերմանացի կինոբեմադրիչը հիմնականում կանանց իրավունքների և իրավահավասարության թեմաներով նմանատիպ ֆիլմեր է նկարահանել նաև Իրանում և Աֆղանստանում, իսկ այժմյան ֆիլմում անդրադառնում է 8 քուրդ կանանց։

Սաքինա Թեյնան ծնվել է 1973 թ․ Մուշ նահանգի Վարթո գավառում։ Իր ձախակողմյան քաղաքական հայացքների պատճառով նա 2006 թ․, որպես քաղաքական տարագիր, ապաստան է գտել Ավստրիայում, որտեղ ապրում է մինչ օրս։ Սաքինան Ավստրիայում և եվրոպական այլ երկրներում զբաղվում է քուրդ երաժշտության ներկայացման և տարածման գործով։

Ուշագրավ է, որ Սաքինա Թեյնան և Անդրեաս Ռոխոլը որոշել էին Սաքինայի կյանքի պատմությունը ներկայացնող ֆիլմը նկարահանել Հայաստանում։

Մելինե Անումյան

Akunq.net