«Քամփ Արմեն» մանկատունը վերանորոգվելու է և  նորովի ներկայանալու

Ստամբուլում հայ մանուկների համար հայրենի օջախ դարձած «Քամփ Արմեն» մանկատան վերանորոգման հիմքերը կդրվեն այս տարվա հոկտեմբեր ամսին։ Այս ճամբարում, որտեղ միաժամանակ կարող է 100 պատանի մնալ, ծրագրված է ստեղծել նաև մշակութային կենտրոն ու գրադարան։

Այդ մասին հայտնում է Akunq.net-ը՝ վկայակոչելով թուրքական «Քրոնոս» լրատվակայքում հրապարակված տեղեկությունը։

Աղբյուրի համաձայն՝ Ստամբուլում հայ մանուկների համար 1962 թ․ Թուզլայում կառուցված «Քամփ Արմեն» մանկատան վերանորոգումը կատարվելու է Ամերիկայի հայ բողոքական եկեղեցիների միության աջակցութամբ։

Եկեղեցիների միության նախագահ Զավեն Հանջըյանը, նրա տիկինը և Գեդիքփաշայի հայ բողոքական եկեղեցու և դպրոցի հիմնադրամի ու Հրանտ Դինքի անվան դպրոցի աշակերտներն այցելել են «Քամփ Արմեն»։

Աղբյուրը նաև հիշեցնում է, որ այս ճամբարում է անցել «Ակօս» շաբաթաթերթի հիմնադիր և գլխավոր խմբագիր Հրանտ Դինքի մանկությունը։

Հիշեցնենք, որ թուրքական պետությունը տարիներ առաջ փորձում էր ապամոնտաժել այս մանկատունը, որը տարիներ շարունակ ամառային ճամբար էր եղել Թուրքիայի հայ երեխաների համար։ Սակայն պոլսահայ համայնքի ջանքերի և պայքարի արդյունքում մանկատան սեփականության վկայականը հանձնվեց Գեդիքփաշայի հայ բողոքական եկեղեցու հիմնադրամին։

Թարգմանեց Մելինե Անումյանը

Akunq.net