Անկարայի Ուլուս թաղամասի հայկական գերեզմանոցի վրա նախատեսվող շինարարության թույլտվությունը չեղարկվել է թուրքական դատարանի կողմից

Թուրքիայի ճարտարապետների պալատի Անկարայի մասնաճյուղը դատարան էր դիմել Անկարայի Ուլուս թաղամասում հայ կաթոլիկ գերեզմանոցի վրա նախատեսվող շինարարությունը կասեցնելու նպատակով։ Ճարտարապետների պալատից ստացված տեղեկության համաձայն՝ դատարանը բավարարել է այդ հայցը և չեղարկել շինարարության թույլտվությունը։

Այդ մասին, Akunq.net-ի փոխանցմամբ, հաղորդում է Կ․Պոլսի հայկական «Ակօս» շաբաթաթերթի թուրքալեզու կայքէջը։

Ըստ աղբյուրի հաղորդման՝ դատարանի վճիռը մեկնաբանած Ճարտարապետների պալատի Անկարայի մասնաճյուղի նախագահ Թեզջան Քարաքուշ Ջանդանը նշել է․ «Ուղղակի անընդունելի է խանութի կառուցումը բոլոր գիտական աղբյուրներում որպես հայ կաթոլիկ գերեզմանոց հիշատակվող այս տարածքում, որտեղից նաև մարդկային ոսկորներ են ի հայտ եկել։ Դատական հայցով հանդես եկանք մեր եղբայրության և համակեցության կարևոր առհավատչյա հայ կաթոլիկ գերեզմանոցի վրա խանութի անօրինական կառուցման գործի առնչությամբ։ Դատարանի վճիռը ուրախալի է և նպաստավոր հանրության համար, սակայն այնտեղի պատմական գերեզմանոցն ավիրված է։ Հարկավոր է բոլոր պատասխանատուներին պատժել՝ սույն դատավճռի շրջանակներում»։

Թուրք ճարտարապետը նաև հավելել է, որ Անկարայի քաղաքապետարանն անօրինական է գործել՝ այդ տարածքում շինարարություն թույլ տալով, և որ իրենք դիմել են Թուրքիայի մշակութային հարստությունների պահպանման շրջանային խորհուրդ՝ գերեզմանոցը որպես պատմական տարածք գրանցել տալու համար։

Թերևս նման ոչ էական ժեստերով թուրքական իշխանությունները փորձում են «բարեկամական» կեղծ դիմակի տակ թմրացնել հայության զգոնությունը և իբրև թե հայկական հետքերը պահպանելու միտում ցուցադրել, այնինչ, ինչպես հայտնի է, Թուրքիայում այսօր ևս շարունակվում է հայկական մշակութային ժառանգության ավիրումը, որը ոչ միայն չի խոչընդոտվում պետության կողմից, այլև հակառակը՝ դիտմամբ անտեսվում ու խրախուսվում։

Սկզբնաղբյուր՝ https://www.agos.com.tr/tr/yazi/27279/ulus-ta-ermeni-mezarligi-uzerine-yapilan-insaatin-ruhsati-iptal-edildi

Մելինե Անումյան

Akunq.net