Էրդողանը հունարենով սպառնացել է Աթենքին «աղետալի ավարտով»

Թուրքիայի նախագահ Ռեջեփ Թայիփ Էրդողանը «Թվիթեր»-ում սպառնալիքներ է ուղարկել Աթենքին՝ հունարենով, իսկ  ընդդիմադիր «Սիրիզա» սոցիալիստական կուսակցության առաջնորդ և Հունաստանի նախկին վարչապետ Ալեքսիս Ցիպրասը պատասխանել է թուրքերեն թվիթով, հաղորդում է Neos Kosmos-ը այսօր՝ հունիսի 10-ին:

«Մենք ևս մեկ անգամ զգուշացնում ենք Հունաստանին՝ խոհեմ լինել, զերծ մնալ «գաղափարներից», հռետորաբանությունից և գործողություններից, որոնք կհանգեցնեն արդյունքների, որոնց համար նա կզղջա, ինչպես դա արել է մեկ դար առաջ»,- գրել է Էրդողանը։

Նա զգուշացրել է, որ Թուրքիան չի հրաժարվի Էգեյան ծովում իր իրավունքներից և «չի վարանի կյանքի կոչել կղզիների ապառազմականացման վերաբերյալ միջազգային պայմանագրերով ճանաչված իրավունքները»։

«Մենք հանգիստ դիմավորեցինք Հունաստանի մարտահրավերները, որը վերջին երկու տարիների ընթացքում նույնիսկ չի արձագանքել ռազմական պատվիրակությունների հանդիպման՝ մեր հրավերներին»,- հավելել է պետության ղեկավարը։

Իր հաջորդ թվիթում Էրդողանը Հունաստանին մեղադրել է Արևմտյան Թրակիայում, Հռոդոսում և Կոսում թուրքական փոքրամասնությանը «ճնշելու» մեջ, ինչպես նաև պնդել է, որ Հունաստանն «անտեսում է Եվրամիության արժեքները, մարդու իրավունքներն ամբողջ աշխարհում և միջազգային համաձայնագրերը»։

«ՆԱՏՕ-ին և երրորդ երկրների մանիպուլյացիայի ենթարկելու փորձը, նրանց ներգրավելով ապառազմականացված ռեժիմով կղզիներում տարբեր անօրինական զորավարժություններում, պարզապես փորձ չէ։ Դա աղետալի ավարտ կունենա»,- հունարենով ամփոփել է Էրդողանը։

Ալեքսիս Ցիպրասը թուրքերենով  փորձել է հակադարձել հարևան երկրի նախագահի զայրացած արտահայտություններին։

«Տնտեսական ճգնաժամի պատասխանը, որին բոլորս միասին բախվում ենք, ազգայնականությունը չէ։ Հունաստանը կպաշտպանի իր ինքնիշխանությունը ցանկացած սպառնալիքից: Այսպիսով՝ եկեք դադարեցնենք մարտահրավերները և վերադառնանք երկխոսության՝ հիմնված միջազգային իրավունքի վրա»,- կոչ է արել նա Էրդողանին։

Այս շաբաթվա սկզբին Հունաստանը նախազգուշացրեց Թուրքիային, որ ինքը հասել է «զսպվածության և համբերության սահմանին»՝ «թուրքական ինտենսիվ սադրանքների» ժամանակաշրջանից հետո, ներառյալ՝ հունական կղզիների վրա կործանիչների թռիչքները:

https://www.yerkir.am/news/view/272996.html