Ազգայնական շարժում կուսակցության (Milliyetçi Haraket Partisi / MHP) առաջնորդ Դևլեթ Բահչելին Թուրքիայի Ազգային մեծ ժողովին օրինագիծ է ներկայացրել հայերի և հույների դահիճը համարվող Թոփալ Օսմանի «իրավական հեղինակությունը վերականգնելու» նպատակով։
Այդ մասին, ըստ Akunq.net-ի, հայտնում է թուրքական «Դուվար» օրաթերթը։
Թուրքական պարբերականը հիշեցնում է, որ Թոփալ Օսմանը պատմությանը հայտնի է որպես հույների, հայերի, քրդերի և ալևիների դեմ տասնյակ արյունոտ գործողություններ իրականացրած հանցագործ։ Դևլեթ Բահչելիի ստորագրությունը կկրող սույն օրինագծի «հիմնավորման» մեջ նշվում է, թե Թոփալ Օսմանը քեմալական շարժման «խիզախ ու հերոսական զավակներից» մեկն է եղել։
Ինչպես արձանագրում է թուրքական աղբյուրը, իրականում Թոփալ Օսմանը իր մարդկանց հետ ակտիվ մասնակցել է Արդվինի հայերի կոտորածներին՝ ենթարկվելով Հատուկ կազմակերպության (Teşkilat-ı Mahsusa) հրահանգներին։ Այնուհետև հայերի դահիճը նույն մեթոդները կիրառել է նաև հույն բնակչության հանդեպ և պատմության գիրկն անցել որպես հույների կոտորածների մասնակից։
Թոփալ Օսմանը պատմությանը հայտնի է նաև որպես թուրք կոմունիստ գործիչ Մուստաֆա Սուբխիի և վերջինիս 14 ընկերների մարդասպան։ Այնուհետև Թոփալ Օսմանը 1921 թ․ մասնակցել է Սեբաստիայի Քոչգիրի շրջանի քրդերի ջարդերին։
Հիշեցնենք, որ վերջերս Դիարբեքիրում հայտնվել էր այս մարդասպանի նկարը կրող ավտոբուս, որն ուղարկվել էր Գիրեսունի (Կերասուն) նահանգապետարանի կողմից՝ «Off-Road» («Ճանապարհից դուրս») փառատոնի շրջանակներում։
Թարգմանեց Մելինե Անումյանը
Akunq.net
Leave a Reply