«Մենք կ՛ուզենք, որ միջազգային ընտանիքը իմանայ Ազրպէյճանի արդար պայքարին մասին, եւ կարեւոր է, որ ճիշդ տպաւորութիւն ստեղծուի ստոյգ տեղեկատուութեան հաշուոյն», Պաքուի մէջ յայտարարած է Թուրքիոյ խորհրդարանի նախագահ Մուսթաֆա Շենթոփ:
«Ազատութիւն» ձայնասփիւռի կայանը կը հաղորդէ, որ Շենթոփ Թուրքիոյ եւ Ազրպէյճանի խորհրդարաններու կազմակերպած Հասարակական գիտութիւններու 7-րդ ընդհանուր ժողովի ժամանակ իր արտասանած խօսքին մէջ կարեւոր նկատած է, որ Լեռնային Ղարաբաղը հասարակական գիտութիւններու տարբեր ճիւղերու ուսումնասիրութիւններու նիւթ դառնայ:
«Կը կարծենք, որ այս խորհրդաժողովը կարեւոր է միջազգային ընտանիքի ուշադրութիւնը Ղարաբաղի վրայ հրաւիրելու համար», ըսած է ան:
Մուսթաֆա Շենթոփ, յիշելով Շուշի եւ Ֆիզուլի իր վերջին այցելութիւնը, դարձեալ հայերը մեղադրած է պատերազմէն ետք Ազրպէյճանի կողմէ բռնագրաւուած տարածքները հիմնովին աւերելու յանցանքով:
Թուրքիոյ խորհրդարանի նախագահը նաեւ ընդգծած է, որ Թուրքիան պիտի շարունակէ Կովկասի մէջ մնայուն խաղաղութեան հաստատման ճամբուն վրայ աջակցիլ եղբայրական Ազրպէյճանին:
https://www.aztagdaily.com/archives/548515
Leave a Reply