Թուրքիայի միացյալ ընդդիմությունը խոստանում է նախագահական ընտրություններում առաջադրել միասնական թեկնածու

Թուրքիայի նախկին վարչապետ Ահմեթ Դավութօղլուն հայտարարել է, որ իր ներկայացրած՝ վեց ընդդիմադիր կուսակցությունների դաշինքը, ամենայն հավանականությամբ, միասնական թեկնածու կառաջադրի երկրի նախագահական ընտրություններում։

Ապագա կուսակցությունը գլխավորող քաղաքական գործիչը փաստացի հայտարարել է ընդդիմության նախընտրական արշավի մեկնարկի մասին. չորեքշաբթի հաղորդում է «Քարար» թերթը։

«Նոր նախագահը կլինի կա՛մ վեց կուսակցություններից մեկի ղեկավարը, կա՛մ դրսից թեկնածու։ Սակայն, անկախ սրանից, մենք նրանից պարտավորություններ ենք պահանջելու՝ հետևելու մեր սահմանած սկզբունքներին։ Բայց սա բավարար չէ. վեց կուսակցությունների ղեկավարները երաշխավորներ կդառնան նրա նախագահության օրոք»,- ասել է Դավութօղլուն։

Նրա խոսքով՝ ընդդիմադիր դաշինքի ներկայացուցիչները, որոնք միավորում են վեց կուսակցություններ, «ապագայում կորոշեն Թուրքիայի ճակատագիրը»։ Նախկին վարչապետը նաև ասել է, որ ընդդիմությունը հետամուտ է լինելու երկրում խորհրդարանական կառավարման համակարգի վերադարձին։

Թուրքիայում նախագահական և խորհրդարանական ընտրությունները նշանակված են 2023 թ. հունիսին։ Ժողովրդական դաշինք իշխող դաշինքը, որը ներառում է «Արդարություն և զարգացում» (AKP) և ծայրահեղ աջ Ազգայնական շարժում կուսակցությունները, ավելի վաղ հայտարարել էր, որ գործող նախագահ Թայիփ Էրդողանը լինելու է իրենց միակ թեկնածուն: Ընդդիմությունը դեռ չի նշել իր թեկնածուին։ Ընդդիմադիր վեց կուսակցությունների դաշինքը պնդում է, որ արտահերթ ընտրություններ անցկացվեն։

63-ամյա Դավութօղլուն հեռացել է Էրդողանի ԱԶԿ-ից 2019 թվականին՝ նրա քաղաքական ուղեգծի հետ անհամաձայնության պատճառով։

https://yerkir.am/news/view/272216.html