Թուրքիան և Ադրբեջանը հակահայկական ծրագրեր են իրականացնում, դրանց ադեկվատ չարձագանքելը նշանակում է սպասարկել թուրք-ադրբեջանական տանդեմի շահերը. Արմեն Ռուստամյան

ԱԺ «Հայաստան» խմբակցության անդամները մասնակցել են Ազատության հրապարակում ընթացող  հանրային քննարկումներին: Նրանք մասնավորապես անդրադարձել են Հայաստան-Թուրքիա հարաբերությունների մասին խորհրդարանական լսումներ անցկացնելու իրենց առաջարկն իշխանությունների կողմից մերժելուն:

«Այն պատճառաբանությունը, որը նրանք են բերում, ծիծաղելի է, որ տեխնիկական պատճառներով չեն կարող կազմակերպել լսումները։ Լսումների կազմակերպումը պարտավորություն է, որը պետք է իրականացվի։ Այն, ինչն իրենք են անում, Սահմանադրության, օրենքների խախտում է։ Այսինքն, նրանք ասում են՝ տեխնիկական պատճառներով խախտում են Սահմանադրությունն ու օրենքները»,- ասաց Արմեն Ռուստամյանը։

Նա ընդգծեց, որ Թուրքիան և Ադրբեջանը հակահայկական ծրագրեր են իրականացնում, դրանք պետք է արձագանքի արժանանան։

«Դրանց ադեկվատ չարձագանքելը, չգծելն այն կարմիր գծերը, որոնցից այն կողմ ՀՀ-ն չի պատրաստվում որևէ զիջում անցկացնել, նշանակում է սպասարկել թուրք-ադրբեջանական տանդեմի շահերը։ Ապօրինի արգելափակելով, խոչընդոտելով լսումները՝ նրանք ևս մեկ անգամ ընդգծեցին, որ մեր մտահոգությունները, որ այս իշխանություններն իրենց քայլերով, ըստ էության, եկել են սպասարկելու թուրք-ադրբեջանական շահերը, ևս մեկ անգամ է արձանագրվում»,- ասաց Ռուստամյանը։

https://www.tert.am/am/news/2022/04/21/rustamyan/3792514