Թուրքիայի գերագույն դատարանը կուսակցությունների ցանկում չի ներառել «Քուրդիստան» բառով կուսակցությունները

Թուրքիայի Գերագույն դատարանը հրապարակել է Թուրքիայում գործող քաղաքական կուսակցությունների և նրանց անդամների թիվը։ Ցուցակում քանակապես 121 կուսակցություն է ներկայացված, բայց 3 տեղ դատարկ է թողնված. ցանկում չեն ներառվել այն կուսակցությունները, որոնց անվանման մեջ առկա է «Քուրդիստան» բառը:

Թուրքիայում գործող քաղաքական կուսակցություններից ներքոնշյալներն են, որ իրենց անվան մեջ ունեն «Քուրդիստան» բառը։

• «Քուրդիստանի սոցիալիստական կուսակցություն» (PSK)

• «Քուրդիստանի կոմունիստական կուսակցություն» (KKP)

• «Քուրդիստանի ազատության շարժում կուսակցություն» (PAK)

• «Քուրդիստանի ժողովրդավարական կուսակցություն – Թուրքիա» (PDK – T)

Վերոհիշյալ կուսակցություններից ոչ մեկը դեռ որևէ հայտարարություն չի արել:

Նշենք, որ մինչ օրս Թուրքիայում բազմաթիվ կուսակցություններ են լուծարվել «Քուրդիստան» բառի պատճառով:

Այսպես` 1963 թվականից ի վեր Թուրքիայում Սահմանադրական դատարանի կողմից լուծարվել են 28 քաղաքական կուսակցություններ, որոնցից 7-ը` քրդական: Լուծարման հիմք են հանդիսացել կրոնական նկատառումները, ինչպես նաև Թուրքիայի տարածքային մասնատմանն ուղղված քայլերը:

Ermenihaber.am