Ալիեւը Էրդողանին տեղեկացրել է Բրյուսելում կայացած հանդիպման արդյունքներով պայմանավորվածությունների մասին

Ադրբեջանի եւ Թուրքիայի նախագահներ Իլհամ Ալիեւը եւ Ռեջեփ Թայիփ Էրդողանը հինգշաբթի հեռախոսազրույց են ունեցել, որի ընթացքում կողմերը քննարկել են երկկողմ համագործակցությունը եւ ադրբեջանա-հայկական հարաբերությունների կարգավորման գործընթացը, հաղորդում են ադրբեջանական լրատվամիջոցները։

«Ապրիլի 7-ին նախագահ Ալիեւը զանգահարել է նախագահ Էրդողանին։ Զրույցի ընթացքում կողմերը քննարկել են ապրիլի 6-ին Բրյուսելում ԵՄ-Ադրբեջան-Հայաստան ձեւաչափով եռակողմ հանդիպումը։ Նախագահ Ալիեւը դրական է գնահատել ձեռք բերված արդյունքները»,- ասվում է Ադրբեջանի նախագահի մամուլի ծառայության հաղորդագրությունում:

Ալիեւը նշել է, որ բանակցություններից հետո պայմանավորվածություն է ձեռք բերվել աշխատանքային խմբի ստեղծման վերաբերյալ՝ Հայաստանի եւ Ադրբեջանի միջեւ խաղաղության պայմանագիր նախապատրաստելու համար՝ հիմնվելով Ադրբեջանի կողմից ներկայացված հիմնարար սկզբունքների վրա, «որոնք, ի թիվս այլ բաների, ներառում են տարածքային ամբողջականության փոխադարձ ճանաչումը եւ տարածքային պահանջներից հրաժարվելը»։

«Էրդողանն իր հերթին գոհունակություն է հայտնել ձեռք բերված արդյունքներից»,- ընդգծվում է տեղեկատվության մեջ։

«Զրույցի ընթացքում նշվել է, որ Հայաստանի եւ Ադրբեջանի միջեւ խաղաղության պայմանագրի ստորագրումը, տրանսպորտային եւ այլ հաղորդակցությունների բացումը կապահովեն խաղաղությունն ու կայունությունը տարածաշրջանում, կնպաստեն տարածաշրջանի երկրների զարգացմանը»,- ասվում է հաղորդակցության մեջ։

«Պետությունների ղեկավարները մտքեր են փոխանակել ադրբեջանա-թուրքական երկկողմ դաշնակցային հարաբերությունների տարբեր ասպեկտների շուրջ»,- ընդգծում է Ադրբեջանի նախագահի մամուլի ծառայությունը։

https://news.am/arm/news/695571.html