Արեւելագետ․ Հայ-թուրքական հարաբերությունների կարգավորման շուրջ բանակցությունները դժվար թե հաջողության հանգեցնեն

Հայ-թուրքական հարաբերությունների կարգավորման շուրջ բանակցությունները դժվար թե հաջողության հանգեցնեն։ Այս մասին դեկտեմբերի 27-ին Երեւան-Մոսկվա տեսակամրջի ժամանակ ասել է Հայաստանի ԳԱԱ Արեւելագիտության ինստիտուտի տնօրեն Ռուբեն Սաֆրաստյանը։

Այնուամենայնիվ, ինչպես նշում է փորձագետը, գործընթացն ինքնին կարող է որոշակի դիվիդենտներ բերել Հայաստանին։ Նա գրեթե վստահ է, որ Անկարան իրականում չի ցանկանում Երեւանի հետ հարաբերությունների կարգավորում։ Արեւելագետը հիշեցրեց, որ Հայաստանի անկախության տարիներին Թուրքիայի հետ հարաբերությունները կարգավորելու երեք փորձ է արվել։

«Հայաստանի ղեկավարները մեծ նշանակություն են տվել Անկարայի հետ հարաբերությունների կարգավորմանը։ Բայց երեք փորձերն էլ անհաջողությամբ են ավարտվել։ Ինձ համար եզրակացությունը միանգամայն պարզ է՝ այս ամենը շատ դժվար է, քանի որ ստորջրյա խութերը շատ են։ Իսկ հիմա մեծ է հավանականությունը, որ ոչինչ չի ստացվի։ Նախ այն պատճառով, որ Թուրքիան չի ցանկանում Հայաստանի հետ հարաբերությունների կարգավորում։ Նրա ինչին է պետք նորմալացումը, եթե դրա դիմաց որեւէ էական բան չի ստանալու: Իսկ այն, ինչ էական է Անկարայի համար, հայտնի է բոլորին։ Սրանք երեք հիմնական պահանջներն են Հայաստանին՝ հրաժարվել Օսմանյան կայսրությունում Հայոց ցեղասպանության ճանաչման քաղաքականությունից, հրաժարվել Հայաստանի կողմից Լեռնային Ղարաբաղի Հանրապետությանը աջակցությունից եւ պաշտոնապես հաստատել Երեւանի կողմից 1921 թվականի Կարսի պայմանագրին հավատարմությունը: Այժմ դրանց ավելացել է չորրորդ պահանջը՝ այսպես կոչված «Զանգեզուրի միջանցքի» բացումը»,- պարզաբանեց Սաֆրաստյանը։

Նա կարծում է, որ Հայաստանի իշխանությունները չեն համաձայնի բավարարել այդ պահանջները, եւ այդ պատճառով էլ բանակցություններն ապրիորի դատապարտված են ձախողման։

«Սակայն Հայաստանին հիմա բանակցություններ են պետք։ Իհարկե, Երեւանը ներկայում ավելի թույլ է, քան նախկինում էր, բայց կա բարենպաստ կոնյունկտուրա։ Այսպես, երեք տերություններ՝ ԵԱՀԿ Մինսկի խմբի երեք համանախագահներ՝ ի դեմս Ռուսաստանի, ԱՄՆ-ի եւ Ֆրանսիայի, ճանաչել են Հայոց ցեղասպանությունը։ Հայաստանն այժմ պետք է ավելի ակտիվ աշխատի նրանց հետ, որպեսզի նրանք մեծացնեն ճնշումը Թուրքիայի վրա եւ հասնեն նրան, որ նա ճանաչի Ցեղասպանությունը, ինչպես նաեւ զիջումների գնա այլ ոչ պակաս կարեւոր հարցերում»,- նշեց փորձագետը։

https://news.am/arm/news/679615.html