Նոր դիվանագիտական լարվածություն թուրք-բուլղարական հարաբերություններում

Թուրքիայում Բուլղարիայի արտակարգ և լիազոր դեսպանը հրավիրվել է Թուրքիայի արտգործնախարարություն:

Պատճառն այն է, որ նախօրեին պաշտոնական Սոֆիան Թուրքիային մեղադրել էր  Բուլղարիայում նոյեմբերի 14-ին կայացած նախագահական և խորհրդարանական ընտրություններին, ինչպես նաև ներքին գործերին միջամտելու մեջ: Այդ հարցով նույնիսկ Բուլղարիայի արտգործնախարարություն էր կանչվել Թուրքիայի դեսպանը:

Արտգործնախարարությունում տեղի ունեցած զրույցի ժամանակ թուրքական կողմը հերքել է այն  մեղադրանքները, ըստ որոնց՝ Անկարան  ընտրությունների օրը փորձել է ուղղորդել Բուլղարիայի քաղաքացիներին, որոնք գտնվում են Թուրքիայում:

Բանն այն է, որ Բուլղարիայի նախագահական ընտրություններին մասնակցել էր ազգությամբ թուրք թեկնածու Մուստաֆա Քադայը, և դրանով է պայմանավորված Թուրքիայի միջամտությունը: Եվ չնայած այդ ամենին՝ ընտրությունների արդյունքում նա զբաղեցրել է 3-րդ տեղը, հավաքելով 13 տոկոս ձայն, իսկ նրա ղեկավարած կուսակցությունը՝ 11 տոկոս ձայն:

Անկարան նաև հերքել է Բուլղարիայի այն հայտարարություններն այն մասին, որ Թուրքիան միջամտում է այդ երկրի ներքին գործերին:

Փոխարտգործնախարար Ֆարուք Քայմաքչըն բուլղարացի դեսպանի հետ զրույցում նշել է որ ընտրությունների օրը Թուրքիան միայն «համապատասխան պայմաններ է ստեղծել Թուրքիայի տարածքում» Բուլղարիայի քաղաքացիություն ունեցող անձանց քվեարկությունը ապահովելու  համար:

Նշվել է, որ բուլղարացի դեսպանին հանձնվել է դիվանագիտական նոտա:

https://www.ermenihaber.am/am/news/2021/11/19/%D4%B9%D5%B8%D6%82%D6%80%D6%84%D5%AB%D5%A1-%D4%B2%D5%B8%D6%82%D5%AC%D5%B2%D5%A1%D6%80%D5%AB%D5%A1/220272