Չաւուշօղլու. «Եթէ Հայաստանը պատրաստ է, ապա Թուրքիան եւս պատրաստ է»

Թուրքիան Հայաստանի Հանրապետութեան Սիւնիքի մարզին մէջ Հայաստանի քայլերը կը նկատէ «ահաբեկչական յարձակում» եւ կը խոստանայ ստեղծուած վիճակին մէջ մինակ չձգել Ազրպէյճանը: «Անատոլու» կը հաղորդէ, որ այս մասին յայտարարած է Թուրքիոյ արտաքին գործոց նախարար Մեւլութ Չաւուշօղլու:

Թուրքիոյ արտաքին գործոց նախարարը կոչ ուղղած է` միացեալ քայլերու ձեռնարկելու շրջանին մէջ խաղաղութեան եւ կայունութեան ապահովման համար. «եթէ Հայաստանը պատրաստ է, ապա Թուրքիան եւս պատրաստ է: Երեւանի համար սադրանքները ձախողութիւններ պիտի ըլլան»:

Չաւուշօղլուի համաձայն, Անգարան կը զօրակցի շրջանին մէջ երկարաժամկէտ կայունութեան եւ համագործակցութեան նոր էջի բացման:

«Երեւանը պէտք է մէկ անգամ ընդմիշտ ճանչնայ, որ անոնք Ազրպէյճանի տարածքներն են, որոնք ապօրինի կերպով բռնագրաւուած են Հայաստանի կողմէ», ըսած է թրքական դիւանագիտութեան պետը:

https://www.aztagdaily.com/archives/529562