Թուրքիոյ արտաքին գործոց նախարարը կը խոստանայ ամէն իմաստով օժանդակել Լիբանանին

Հանրապետութեան նախագահ զօր. Միշել Աուն երէկ ընդունեց Թուրքիոյ արտաքին գործոց նախարար Մեւլութ Չաւուշօղլուն, որուն հետ քննարկեց լիբանանեան իրադարձութիւնները, ինչպէս նաեւ երկկողմանի յարաբերութիւնները:

Հանդիպումին ընթացքին նախագահ Աուն ողջունեց ամէն տեսակի օժանդակութիւն, որ Թուրքիա կրնայ տրամադրել Լիբանանին, յատկապէս սուրիացի տեղահանուածներուն տունդարձը ապահովելու առումով:

Իր կարգին, Չաւուշօղլու հաստատեց, որ իր հանդիպումներուն ընթացքին պիտի քննարկէ լիբանանեան-թրքական յարաբերութիւններն ու գործակցութիւնը ամրապնդելու կարելիութիւնները:

Չաւուշօղլու այցելեց նաեւ խորհրդարանի նախագահ Նեպիհ Պըրրիի, որուն հետ հանդիպումէն ետք յայտնեց, թէ Պըրրի հաստատած է, որ Լիբանանի երեսփոխանական ընտրութիւնները պիտի կատարուին յառաջիկայ մարտին:

Չաւուշօղլու նշեց, որ Պըրրիի հետ քննարկած է զոյգ երկիրներու խորհրդարաններուն միջեւ գործակցութիւնն ու երկկողմանի յարաբերութիւնները ամրապնդելու հեռանկարները:

Կէսօրին Չաւուշօղլու այցելեց լիբանանցի իր պաշտօնակիցին` Ապտալլա Պու Հապիպի, որուն հետ հանդիպումէն ետք, անոնք հրաւիրեցին մամլոյ միացեալ ասուլիսի մը:

Պու Հապիպ մաղթեց, որ Թուրքիա դիւրութիւններ տրամադրէ` իր շուկաները բանալով լիբանանեան արտադրութիւններուն դիմաց:

Իր կարգին, Չաւուշօղլու հաստատեց, որ լիբանանցիները պէտք չէ ստիպուին սուղ վճարել շրջանային սակարկութիւններուն գինը:

Ան անհրաժեշտ նկատեց Լիբանանի եւ Ծոցի երկիրներուն միջեւ դիւանագիտական տագնապին լուծումը բանակցութիւններու ճամբով եւ աւելցուց, որ այս իմաստով Թուրքիա պատրաստ է դրական դերակատարութիւն ունենալ:

Յետմիջօրէին Չաւուշօղլու այցելեց վարչապետարան:

Վարչապետ Նեժիպ Միքաթիի հետ հանդիպումին ընթացքին Չաւուշօղլու հաստատեց, որ Թուրքիա շահագրգռուած է Լիբանանի առողջապահական մարզին զօրակցելու, յատկապէս կառավարական հիւանդանոցներուն օժանդակելու եւ անոնց դեղորայք ու հիւանդանոցային պիտոյք ապահովելու, ինչպէս նաեւ Լիբանանի մէջ ներդրումները աւելցնելու եւ զբօսաշրջական մարզին մէջ փոխադարձ գործակցութիւնը ամրապնդելու առումով:

Նշենք, որ Չաւուշօղլու հանդիպում մը ունեցաւ տնտեսութեան եւ առեւտուրի նախարար Ամին Սալամի հետ, որուն հետ հանդիպումէն ետք շեշտեց, որ Անգարա կը շարունակէ զօրակցիլ Լիբանանի տնտեսական կայունութեան:

https://www.aztagdaily.com/archives/529442