Միացեալ Նահանգներու նախագահ Ճօ Պայտընի գրասենեակը արձագանգած է Ցեղասպանութիւն եզրը գործածելու վերաբերեալ հայ պատմաբաններու նամակին: «Արմէնփրես»¬ի հաղորդումով` այս մասին յայտնած է Հայաստանի Գիտութիւններու ազգային ակադեմիայի պատմութեան հիմնարկի տնօրէն Աշոտ Մելքոնեան:
«Հայոց ցեղասպանութիւն. Թուրքիոյ պատասխանատուութիւնը երէկ եւ այսօր» խորագիրով կլոր¬սեղան քննարկման ժամանակ Աշոտ Մելքոնեան հրապարակած է ամերիկեան վարչակազմի նամակագրութեան բաժինէն ստացուած պատասխանի բովանդակութիւնը:
Նամակին մէջ Միացեալ Նահանգներու նախագահ Պայտընի եւ փոխնախագահ Հարիսի վարչակազմը, շնորհակալութիւն յայտնելով հայ պատմաբաններուն` կապ հաստատելու եւ տրամադրուած տեղեկատուութեան համար, գնահատած են իրենց հետ հաղորդակցելու իւրաքանչիւր կարելիութիւն:
«Մեր երկիրը կը բախի բազմաթիւ մարտահրաւէրներու, եւ ձեր նմանօրինակ նամակները կ՛օգնեն մեզի` աւելի յստակ եւ լաւ հասկնալու, թէ Պայտըն¬Հարիս վարչակազմը ինչպէ՛ս կրնայ օգտակար ըլլալ ձեզի: Մենք ուշադիր պիտի ուսումնասիրենք նամակը եւ պիտի աշխատինք ընթացք տալ», ինչպէս յայտնած է Մելքոնեան, նշուած է հայ պատմաբաններու նամակին Սպիտակ տան պատասխանին մէջ:
Հայ պատմաբաններու ընկերակցութիւնն ու գիտական հանրութիւնը` կարեւոր նկատելով այն, որ Միացեալ Նահանգներու կողմէ Հայոց ցեղասպանութեան ճանաչման հարցին մէջ վճռորոշ է նախագահի դիրքորոշումը, նամակ ուղղած էին Պայտընին, որպէսզի 24 ապրիլին ընդառաջ` համապատասխան հետեւութիւններ կատարուին Ցեղասպանութիւն բառը գործածելու հարցին մէջ:
https://www.aztagdaily.com/archives/506557
Leave a Reply