Կանադայի ԱԳ նախարարը հայտարարել է ԼՂ-ի պատճառով Թուրքիա սպառազինություն արտահանելու թույլտվությունը հետ կանչելու մասին

Կանադան հետ է կանչել նաեւ Թուրքիա սպառազինություն եւ տեխնոլոգիաներ արտահանելու թույլտվությունները այն բանից հետո, երբ երկրի իշխանությունները Լեռնային Ղարաբաղի հակամարտությունում դրանց օգտագործման մասին ապացույցներ են ստացել: Այս մասին ասվում է Կանադայի արտաքին գործերի նախարար Մարկ Գառնոյի հայտարարության մեջ:

«Անցյալ աշնանը, արտահանման վերահսկման մեր խիստ ռեժիմի համաձայն, Կանադայի կառավարությունը կասեցրեց ռազմական ապրանքների եւ տեխնոլոգիաների` Թուրքիա արտահանման թույլտվությունները՝ մինչեւ կանադական տեխնոլոգիան Ադրբեջանի կողմից Լեռնային Ղարաբաղի ռազմական հակամարտությունում օգտագործելու մեղադրանքների վերաբերյալ հետաքննության արդյունքները:

Այս միջոցառումները հաջորդում են 2019-ի աշնանը Թուրքիա արտահանման նոր թույլտվությունների տրամադրումը կասեցնելու որոշմանը, որը տեղի էր ունեցել Սիրիայի հյուսիս-արեւելք նրա ռազմական ներխուժումից հետո:

Կանադայի արտաքին գործերի նախարարությունը, ազգային պաշտպանության նախարարության հետ համատեղ, այդ ժամանակվանից անցկացրել է Թուրքիայի համար ռազմական նշանակության ապրանքների եւ տեխնոլոգիաների արտահանման բոլոր կասեցված եւ գործող թույլտվությունների մանրակրկիտ վերանայում:

Այս հետաքննությունից հետո, որի ընթացքում հայտնաբերվել են համոզիչ ապացույցներ այն մասին, որ Թուրքիա արտահանվող կանադական տեխնոլոգիան օգտագործվել է Լեռնային Ղարաբաղում, ես հայտարարում եմ 2020 թ. աշնանը դադարեցված թույլտվությունների չեղարկման մասին:

Այս (տեխնոլոգիաների եւ ռազմական նշանակության ապրանքների) օգտագործումը չի համապատասխծանում Կանադայի արտաքին քաղաքականությանը եւ Թուրքիայի վերջնական օգտագործման հավաստիացումներին:

Այս առավոտ ես խոսեցի Թուրքիայի արտգործնախարար Մեւլութ Չավուշօղլուի հետ՝ Կանադայի մտահոգությունները հաստատելու եւ կանադացի ու թուրք պաշտոնյաների միջեւ երկխոսության մեխանիզմ նախաձեռնելու համար:

Թուրքիան ՆԱՏՕ-ի կարեւոր դաշնակիցն է, եւ ՆԱՏՕ-ի հետ համագործակցության ծրագրերի հետ կապված հայտերը կգնահատվեն անհատական կարգով»,- ասված է հայտարարության մեջ:

https://news.am/arm/news/638531.html