Թուրքական դատարանը Հրանտ Դինքի գործով ցմահ ազատազրկման է դատապարտել երկու նախկին ոստիկանապետերի

Թուրքական դատարանը թուրքահայ լրագրող Հրանտ Դինքի գործով ցմահ ազատազրկման է դատապարտել երկու նախկին ոստիկանապետերի, հաղորդում է Anadolu-ն:

Դինքը գնդակահարվել էր 2007 թ․ հունվարին իր ղեկավարած «Ակօս» թերթի խմբագրության մոտ:

2011 թ․ Դինքի մարդասպան Օգյուն Սամասթը դատապարտվել է գրեթե 23 տարվա ազատազրկման անչափահասների գործերով դատարանի կողմից: Նա 17 տարեկան էր սպանության կատարման պահին: Հաջորդ տարվա հունվարին Յասին Հայալը դատապարտվել է ցմահ ազատազրկման սպանություն հրահրելու համար:

Ուրբաթ օրը դատարանի կողմից դատապարտվածների թվում է ոստիկանության հետախուզության նախկին պետ Ալի Ֆուաթ Յըլմազերը, ով դատապարտվել է ազատազրկման՝ առանց պայմանական վաղաժամկետ ազատման: Ցմահ ազատազրկման է դատապարտվել նաեւ մեկ այլ ոստիկանապետ՝ Ռամազան Աքյուրեքը:

Թուրքական պետական ​​լրատվամիջոցները Դինքի սպանության մեջ մեղադրել են իսլամական քարոզիչ Ֆեթուլլահ Գյուլենի շարժմանը, որին Անկարան մեղադրում է 2016 թ․ հուլիսին հեղաշրջման փորձ կազմակերպելու մեջ:

2010 թ․ Մարդու իրավունքների եվրոպական դատարանը Թուրքիային պարտավորեցրել է 100 000 վճարել Դինքի ընտանիքին որպես փոխհատուցում՝ հայտարարելով, որ իշխանությունները չեն կարողացել պատշաճ կերպով պաշտպանել Դինքին՝ չնայած գիտեին, որ ուլտրաազգայնականները պատրաստվում էին սպանել նրան:

https://news.am/arm/news/635875.html