Թրքական սպառազինութիւն տեղափոխուած է Հայաստանի հետ սահմանին մօտ` ռազմափորձեր կատարելու նպատակով: «Սփութնիք Արմենիա» կը գրէ, որ այս մասին կը հաղորդէ իրանեան «Ազարիհա Թելեկրամ» ալիքը:
Ալիքը հրապարակած է քանի մը լուսանկարներ, որոնց մէջ կ՛երեւին հրասայլեր, հրետանիներ եւ զրահապատ մեքենաներ: Կը նշուի, որ ռազմափորձերուն մասնակցող զրահապատ մեքենաները նախապէս օգտագործուած են Սուրիոյ մէջ պատերազմական գործողութիւններու ժամանակ: Հրապարակման հեղինակները, յղում կատարելով վերլուծաբաններուն, կը նշեն, որ Անգարան եւ Պաքուն մտադիր են յարձակում գործել Հայաստանի Սիւնիքի մարզին վրայ, որ սահմանակից է Իրանին, եւ այդպիսով կտրել հայ-իրանեան սահմանը:
«Իրան բազմիցս յայտարարած է, որ շրջանի միջազգային եւ աշխարհաքաղաքական սահմաններու փոփոխութիւնը իրեն համար կարմիր գիծ է: Լայնածաւալ պատերազմը կանխարգիլելու համար Իրանի զինեալ ուժերը պէտք է անյապաղ տեղակայուին սահմանի երկայնքին` Հայաստանի եւ Նախիջեւանի միջեւ», կը նշուի հրապարակումին մէջ:
Փետրուարին Իրանի խորհրդարանի նախագահ Մոհամետ Պաղեր Քալպաֆ յայտարարած էր, որ Ղարաբաղի մէջ զինուորական գործողութիւններու հետագայ շարունակութիւնը անվտանգութեան խնդիրներ պիտի յառաջացնէ Իրանի հիւսիսային սահմաններուն համար:
https://www.aztagdaily.com/archives/503549
Leave a Reply