Թուրքական դատարանը ցմահ ազատազրկման է դատապարտել քուրդ մարտիկին

Թուրքական դատարանը ցմահ ազատազրկման է դատապարտել Սիրիայում գործող քրդական Ժողովրդական ինքնապաշտպանության ջոկատների անդամին, հայտնում է Ahvalnews-ը՝ հղում տալով քրդամետ Firat լրատվական գործակալությանը։

Թուրքիան Չիչեք Քոբանեին երկու տարի գերության մեջ պահելուց հետո դատապարտել է ցմահ ազատազրկման։

Չիչեք Քոբանեն, որը հայտնի է նաև որպես Դոզգին Թեմո, ձերբակալվել է 2019 թվականին՝ Սիրիայի հյուսիսում գտնվող Մշրեֆ գյուղում Թուրքիայի զինված ուժերի կողմից իրականացված միջսահմանային ռազմական գործողության ընթացքում:

Քրդամետ լրատվական գործակալությունը նշել է, որ դատարանը ցմահ ազատազրկման է դատապարտել Քոբանեին՝ «պետության միասնության և ամբողջականության դեմ դավադրություն կազմակերպելու» համար:

Քոբանեի փաստաբան Հիդայեթ Էնմեքն ասել է, որ նրա ձերբակալումը և դատավարությունը խախտում են միջազգային իրավունքը։

https://www.tert.am/am/news/2021/03/24/Cicek/3562150