Թուրքիայի արտգործնախարարությունը հանդես է եկել հայտարարությամբ՝ դատապարտելով Հռոմի պապի՝ Իրաք կատարած պատմական այցի ընթացքում Իրաքյան Քուրդիստանի ղեկավարության կողմից պապին նվիրված նամականիշի վրա զետեղված Քուրդիստանի քարտեզը։
Քարտեզում ներկայիս Թուրքիայի արևելյան նահանգներից զգալի մասն ընդգրկված է Քուրդիստանի կազմում։
Թուրքիայի ԱԳՆ-ն այս քայլը բնութագրել է որպես շատ կոպիտ սխալ։
Տարածված հայտարարության մեջ մասնավորապես նշված է.
«Հռոմի Ֆրանցիսկոս պապի Իրաք կատարած այցի առթիվ Իրաքյան Քուրդիստանի իշխանությունների կողմից, ի նշանավորումն պապի այցելության թողարկվելիք նամականիշների մեջ մեր երկրի որոշ նահանգներն ընդգրկող քարտեզ է պատկերված։ Իրաքյան Քուրդիստանի համապատասխան պետական մարմիններից ակնկալում ենք այս կոպիտ սխալի ուղղում և անմիջապես խնդրի պարզաբանում»։
Իրաքյան Քուրդիստանը սկանդալային քարտեզով նամականիշի մասին պարզաբանում է տվել
Հյուսիսային Իրաքի քրդական ինքնավար շրջանի կառավարության մամուլի խոսնակ Ջոթյար Ադիլն Էրբիլում կազմակերպված մամուլի ասուլիսում նշել է, որ իրենց ղեկավարությունը չի հաստատել խնդրո առարկա նամականշների թողարկման ծրագիը, ինչն էլ հանգեցրել էր Թուրքիայի բացասական արձագանքին:
Խոսնակի հաղորդմամբ՝ մի քանի արվեստաբան նամականիշի թողարկման համար ձևավորման նմուշներ է ներկայացրել:
Սակայն մինչև այժմ որևէ նամականիշի թողարկման համար որևէ հաստատում չի տրվել: Թողարկման համար ընտրվելիք նամականիշների ձևավորումը լինելու է օրենքներին և կանոնակարգերին համապատասխան:
Իրանը ևս դատապարտել է Հռոմի պապի՝ Քուրդիստանի քարտեզով սկանդալային նամականիշը
Իրանի արտգործնախարարությունը ևս դատապարտել է Հռոմի պապի՝ Իրաք կատարած պատմական այցի ընթացքում Իրաքյան Քուրդիստանի ղեկավարության կողմից պապին նվիրված նամականիշի վրա զետեղված Քուրդիստանի քարտեզը։ Քարտեզում ներառված են եղել ներկայիս Թուրքիայի և Իրանի որոշ շրջաններ:
Իրանի ԱԳՆ մամուլի խոսնակ Սայիդ Խաթիբզադեն նշել է, որ Հյուսիսային Իրաքի քրդական ինքնավար շրջանի ղեկավարության կողմից ցուցադրված նամականիշների վրա քարտեզի պատկերումը, որում ընդգրկված են տարածաշրջանային երկրները, հակասում է միջազգային իրավունքին:
«Իրանը թեմայի շուրջ իր առարկություններն է ներկայացրել Իրաքի կառավարությանը և կոչ արել անմիջապես շտկել այս ոչ բարեկամական գործողությունը, ասել է Խաթիբզադեն:
Ermenihaber.am
Leave a Reply