Ահմեդ Դավութօղլուն Էրդողանին մեղադրել է երկիրը Եվրոպայից հեռացնելու մեջ

Թուրքիայի նախկին վարչապետ Ահմեդ Դավութօղլուն նախագահ Ռեջեփ Թայիփ Էրդողանին մեղադրել է այն բանում, որ նա երկիրը հեռացնում է Եվրոպայից:

Դավութօղլուն, որը 2019-ին խզել էր Էրդողանի իշխող կուսակցության հետ կապերը եւ ստեղծել Ապագա կուսակցությունը, նշել է, որ 2016-ի հեղաշրջման փորձից հետո ընդունված որոշումները Թուրքիային մղել են դեպի ավելի մեծ ավտորիտարիզմի ուղի:

«Չնայած մեր նախազգուշացումներին` նախագահը եւ կուսակցության ղեկավարությունը որոշել են փոխել երկրի կառավարման համակարգը: Նրանք ընտրել են նախագահական համակարգը: Սա փոխել է քաղաքականության բնույթը Թուրքիայում: Այս մոտեցումը Թուրքիային հեռացնում է ժողովրդավարության եւ կառավարման եվրոպական մոդելից»,- Kathimerini-ին տված հարցազրույցում ասել է Դավութօղլուն։

Դավութօղլուի կարծիքով՝ սա ազդել է նաեւ արտաքին քաղաքականության վրա: «Ինստիտուցիոնալ կապերը եւ երկարաժամկետ ռազմավարությունը փոխարինվել են անձնական կապերով: Եթե Էրդողանը լավ հարաբերություններ ունի [Ռուսաստանի նախագահ Վլադիմիր] Պուտինի հետ, ապա լավ հարաբերություններ ունի նաեւ Ռուսաստանի հետ: Նույնն է Թրամփի հարցում»,- ասել է նա:

Միեւնույն ժամանակ Դավութօղլուն պաշտպանել է Էրդողանի դիրքորոշումը Միջերկրական ծովի արեւելքում:

«Թուրքիան Միջերկրական ծովի ափին ունի ամենաերկար ափամերձ գիծը: Նրանք, ովքեր կարծում են, որ Կաստելորիզոյի եւ Կիպրոսի միջոցով կարող են արգելափակել Թուրքիային Անթալիայի ծոցում, պետք է իմանան, որ Թուրքիան վճռականորեն կարձագանքի»,- ասել է Դավութօղլուն:

Կրկնելով Էգեյան ծովի «գորշ գոտիների» մասին Անկարայի հայտարարությունները՝ նա ասել է, որ հետազոտական շփումները պետք է շարունակվեն, բայց հոռետեսորեն է գնահատել դրանց հեռանկարները: «Էգեյան ծովում, ինչպիսիք են մայրցամաքային ծոցը, խնդիրները կշարունակվեն, մենք չենք կարող հույս ունենալ լուծում գտնելու վրա»,- ասել է Դավութօղլուն:

https://news.am/arm/news/632632.html