Եվրախորհրդարանի պատգամավոր և Թուրքիայի հարցերով նախկին զեկուցող Քեթի Փիրիի և նրա անդամակցած Նիդերլանդների Աշխատավորական կուսակցության (PvdA) պաշտոնակայքերը ենթարկվել են թուրք հաքերների հարձակմանը։ Արդյունքում նշված կայքերը մի քանի ժամ անհասանելի են եղել։
Աշխատավորական կուսակցությունը հայտնել է, որ հարձակման աղբյուրը արտասահմանյան է եղել։ Իսկ Քեթի Փիրին հայտարարել է, որ հարձակումն իրականացրել են թուրք հաքերները։ ԵԽ պատգամավորը իրեն և իր կուսակցությանը պատկանող կայքերի դեմ իրականացված հարձակումը որակել է որպես «աննախադեպ և մտահոգիչ»։
Նշենք, որ Թուրքիայի ներքին գործերի նախարար Սուլեյման Սոյլուն կիսվել էր Քեթի Փիրիի գրառմամբ ու գրել․ «Դու ծերանալու ես քո կեղտոտ պահանջների հետ միասին։ Բայց այդ վատ ցանկություններդ Թուրքիայում երբեք չեն իրականանալու»։
Հիշեցնենք, որ ԵԽ հոլանդացի պատգամավոր Քեթի Փիրին հայտնի է Թուրքիայի և նախագահ Ռեջեփ Թայիփ Էրդողանի վերաբերյալ իր խիստ քննադատական զեկույցներով, ինչի համար նախկինում էլ ենթարկվել է թուրք հաքերների հարձակումներին։
Leave a Reply