«Ֆրանսայի հետ աշխատանք կը տանինք յարաբերութիւններու բնականոնացման ճամբու քարտէս գոյացնել» կ՛ըսէ Չաւուշօղլու

Թուրքիոյ արտաքին գործոց նախարար Մեւլութ Չաւուշօղլու յայտնեց, որ իր երկիրը Ֆրանսայի հետ աշխատանք կը տանի երկկողմանի յարաբերութիւններու բնականոնացման համար ճամբու քարտէս գոյացնել` նշելով, որ այդ ուղղութեամբ յառաջդիմութիւն արձանագրուած է:

Չաւուշօղլու Փորթուգալի արտաքին գործոց նախարար Սանթոս Սիլվայի հետ Լիզպոնի մէջ տրուած մամլոյ ասուլիսի ընթացքին ֆրանսական կողմը պատասխանատու նկատեց Անգարայի եւ Փարիզի միջեւ գոյութիւն ունեցող լարուածութեան համար` նշելով, որ Թուրքիան երբեք Ֆրանսայի դէմ չէ, այլ Ֆրանսան է, որ Թուրքիոյ բուռն կերպով կ՛ընդդիմանայ 2019 թուականի աշնան Սուրիոյ հիւսիս-արեւելքին մէջ քրտական ուժերուն դէմ զինուորական «Խաղաղութեան ակունք» գործողութեան շղթայազերծումէն ի վեր:

Չաւուշօղլու նշեց, որ Ֆրանսայի արտաքին գործոց նախարար Ժան Իվ Լը Տրիանի հետ ունեցած է «շատ կառուցողական» հեռաձայնային հաղորդակցութիւն մը, որ պսակուած է երկու երկիրներուն միջեւ յարաբերութիւններու բնականոնացման ճամբու քարտէսի կազմութեան շուրջ համաձայնութեամբ:

Ան յայտնեց, որ երկու կողմերը սկսած են աշխատիլ այդ քարտէսին վրայ, եւ «հոլովոյթը լաւ կ՛ընթանայ»:

«Եթէ Ֆրանսան անկեղծ է, ապա Թուրքիան պատրաստ է յարաբերութիւնները բնականոնացնելու», նշեց ան:

Թրքական դիւանագիտութեան պետը համոզում յայտնեց, որ ամբողջ Եւրոպական Միութեան հետ իր երկրին յարաբերութիւնները կարիքը ունին «աւելի լաւ մթնոլորտի» ապահովման:

https://www.aztagdaily.com/archives/495228