ԵՄ-ն դանդաղ տեմպերով է շարժվում՝ ի պատասխան Արեւելյան Միջերկրական ծովում Թուրքիայի սադրանքներին. Հունաստանի ԱԳՆ

Հունաստանի արտաքին գործերի նախարար Նիքոս Դենդիասը հայտարարել է, որ Եվրամիությունը դանդաղ տեմպերով է շարժվում՝ ի պատասխան Արեւելյան Միջերկրական ծովում եւ Էգեյան ծովում Թուրքիայի սադրանքներին, գրում է Ekathimerini-ը:

Ընդ որում՝ Դենդիասը նշել է, որ Աթենքը շարունակում է առաջ քաշել Թուրքիայի դեմ պատժամիջոցները «համբերատարությամբ եւ համառությամբ»:

«Քայլն արված է, սակայն կառավարությունը երբեք չի հայտարարել, որ դա բավարար է»,-հայտարարել է Դենդիասը՝ հղում անելով դեկտեմբերի 10-11-ին Եվրախորհրդի գագաթնաժողովում ընդունված որոշումը պատժամիջոցների քննարկումը մինչեւ մարտ հետաձգելու մասին:

Մեկնաբանելով փաստարկը, որն առաջ են քաշել ԵՄ մի քանի երկրներ, որ Թուրքիային զենքի վաճառքի արտահանման արգելքը կտապալի ՆԱՏՕ-ի միասնությունը, Հունաստանի ԱԳ նախարարը հռետորական հարց է տվել. «Ինչպե՞ս նրանք կարող են արդարացնել իրենց դիրքորոշումը, երբ Միության գլխավոր հենասյունը՝ ԱՄՆ-ը, սահմանել է պատժամիջոցներ Թուրքիայի դեմ փաստարկի հիման վրա, որ այդ երկիրը ձախողում է ՆԱՏՕ-ի միասնությունն ու անվտանգությունը»:

Նա հավելել է, որ ռուսական Ս-400 հակահրթիռային պաշտպանության համակարգերը ձեռքբերելու առնչությամբ Թուրքիայի դեմ Վաշինգտոնի որոշումը պատժամիջոցների մասին, անկասկած, հզոր ազդակ է, հատկապես, հաշվի առնելով, որ այն ընդունվել էր ԵՄ նիստի հաջորդ օրը:

https://news.am/arm/news/619954.html