Եթե Ադրբեջանը շարունակի հարձակումը, Միացյալ Նահանգները պետք է ճանաչի Արցախի Հանրապետության անկախությունը. ԱՄՆ սենատոր Բրեդ Շերման

Միացյալ Նահանգները պետք է հետևյալը ուղերձը հղի՝ եթե Ադրբեջանը շարունակի հարձակումն, ապա մենք պատրաստ կլինենք ճանաչելու Արցախի Հանրապետությունը՝ որպես անկախ պետություն, ֆեյսբուքյան իր պաշտոնական էջում, անդրադառնալով Թուրքիային և Ադրբեջանին զենքի վաճառքն արգելելու վերաբերյալ բանձևերի ներկայացման, գրել է ԱՄՆ Ներկայացուցիչների պալատի արտաքին հարաբերություների հանձնաժողովի անդամ Բրեդ Շերմանը:

«Արդեն չորս շաբաթ է՝ Ադրբեջանը խախտել է հումանիտար հրադադրի վերաբերյալ ձեռք բերված երկու պայմանավորվածությունները և շարունակում է խտրականությունը՝ թիրախավորելով արցախահայությանը:

Արդբեջանից հնչող ուղերձը շատ պարզ է՝ բռնություն, և ոչ թե բանակցություններ. սա է պատասխանը:

Միացյալ Նահանգները պետք է այլ ուղերձ հղի. եթե հարձակումը շարունակվի, մենք պատրաստ կլինենք ճանաչել Արցախի Հանրապետությունը՝ որպես անկախ պետություն»,- գրել է Շերմանը:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 22-ի դրությամբ Արցախի զինուժը խոցել է հակառակորդի՝ 16 ուղղաթիռ, 23 ինքնաթիռ, 202 անօդաչու թռչող սարք, 580 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 6459 զոհ։ Հայկական կողմից, նախնական տվյալներով, կա 900 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 36 քաղաքացիական անձ, վիրավորվել է 115 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։

Արդեն երկու անգամ հայտարարվել է մարդասիրական հրադադարի մասին, սակայն ադրբեջանական զինուժը դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։

https://www.tert.am/am/news/2020/10/23/sherman/3425765